Мәжіліс депутаты Ерлан Саиров денсаулық сақтау министрлігін ірі фармацевтикалық компаниялардың мүддесін лобби жасады деп күмән келтірді, деп хабарлайды Ulysmedia.kz.
ТОЛЫҒЫРАҚ
Депутаттың айтуынша, соңғы үш жылда дәрі-дәрмекке қатысты кері әсерлер туралы сегіз мыңға жуық шағым түссе де, тек бір ғана препарат айналымнан алынған. Бұл дерек жоғарғы аудиторлық палата есебінде де көрсетілген.
– Қазақстанның денсаулық сақтау жүйесі шетелдік фармацевтикалық алпауыттардың мүддесін қорғайтын құралға айналғандай әсер қалдырады. Бұл – өте өкінішті жағдай! Аудит қауіпті дәрілерді уақытында айналымнан алмау фактілерін анықтады. Мысалы, 2022–2024 жылдар аралығында өмірге қауіпті реакциялар жөнінде мыңнан астам ескерту түскен, алайда тек бір жағдайда ғана – “Окситоцин” препараты жедел түрде айналымнан алынған, – деді ол.
Сонымен қатар, депутат министрлік тіркелмеген дәрілердің елге әкелінуіне бақылау жасамайтынын атап өтті.
– Қолданыстағы заңнамада фармацевтикалық субстанцияларды мемлекеттік тіркеу мен елге әкелуге рұқсат беру тәртібі қарастырылмаған. Соның салдарынан әкелінетін шикізаттың сапасы мен қауіпсіздігіне бақылау жоқ. Қауіпті дәрілер туралы мәліметтерге неге кеш жауап беріледі немесе мүлде назар аударылмайды? Мұнда сыбайлас жемқорлық элементтері жоқ па? Ірі компаниялардың мүддесін қорғау жоқ па деген сұрақтар туындайды, – деді депутат.
ЖАУАП
Денсаулық сақтау министрінің міндетін атқарушы Ардақ Амангелдиев дәрі-дәрмек қауіпсіздігіне бақылаудың жеткіліксіз екенін мойындады.
– Иә, бұл – біздің жүйелі мәселеміз. Дәрі-дәрмекті іріктеу процесі тікелей өндірушілерге тәуелді. Қаржылық тұрғыда да біз соларға бағыныштымыз. Жүйе өндірушілерге алдын ала ескерту жасауды, дәрілерді іріктеуді, сараптама жүргізуді қарастырады. Егер қаражат бөлінбесе, жоспарланған үш мың препараттың тек 50 пайызы ғана іріктеледі. Фармацевтикалық бақылауды күшейту үшін тиісті шараларды әзірлеп жатырмыз, – деді ол.