Қазақстандық министрлер көптен күткен демалысты қайда және қалай өткізетіндерін айтты, деп хабарлайды Ulysmedia.kz.
ТОЛЫҒЫРАҚ
Ulysmedia.kz тілшісі министрлерден жаз мезгілін қалай өткізуді жоспарлап отырғандарын сұрады.
ДЕМАЛМАЙТЫНДАР
Бірнеше министр бұл жазда демалысқа шығуды жоспарламайтындарын мәлімдеді. Мысалы, еңбек және халықты әлеуметтік қорғау министрі Светлана Жақыпова ведомство үш заң жобасын дайындап жатқанын айтты.
– Демалыс жоқ, жұмыс істеп жатырмыз, себебі біз келесі сессияға дейін, депутаттар каникулдан оралғанға дейін үш заң жобасын әзірлеуіміз керек, – деді ол.
– Қызметке келгеніме үш ай ғана болды, сондықтан, бәлкім, демалысқа шықпайтын шығармын. Жұмыс істей беремін, – дейді энергетика министрі Ерлан Ақкенженов.
“ДЕМАЛУҒА МҰРША ЖОҚ”
– Қазір біз Орталық Азиядағы алғашқы суперкомпьютерді Астанада орнату жұмыстарымен айналысып жатырмыз. Қазан айында өтетін Digital Bridge форумына дайындалып жатырмыз. Сонымен қатар, президент жанындағы жасанды интеллект жөніндегі кеңестің алғашқы отырысы өтеді. Бірқатар халықаралық іс-шаралар күтілуде. Демалыс жоспарда жоқ, жұмыс кестесі тығыз, – деді Жаслан Мәдиев.
ӘЗІРГЕ НАҚТЫ ЕМЕС
Туризм және спорт министрі Ербол Мырзабосынов әзірге нақты жоспар жоқ екенін айтты. Алайда демалатын болса, Қазақстан аумағында ғана болмақ.
– Жұмыс кестесі тығыз – біздің министрлік туристік маусымға жауапты. Мүмкін 3-5 күндік қысқа мерзімді демалыс болар. Қазақстандағы туристік бағыттарда демалуды жоспарлап отырмын, – деді министр.
НАҚТЫ ШЕШІМ ЖОҚ
– Иә, демалысқа шығуым мүмкін. Қайда баратынымды әзірге шешкен жоқпын. Әдетте Қазақстандағы санаторийлерде, мүмкін, Сарыағашта демалуды таңдайтынмын, – деді Денсаулық сақтау министрі Ақмарал Әлназаров.
– Қазақстанда демаламын. Қазірше қашан және қайда екені нақты емес. Жұмыс көп, – дейді бәсекелестікті қорғау және дамыту агенттігінің басшысы Марат Омаров.
“НЕМЕРЕЛЕРІМДІ КӨРМЕГЕЛІ КӨП БОЛДЫ”
Оқу-ағарту министрі Ғани Бейсембаев Ulysmedia.kz тілшісіне берген сұхбатында немерелерін көрмегелі біраз уақыт болғанын, сондықтан солармен уақыт өткізгісі келетінін айтты.
– Иә, демалысқа шығуды жоспарлап отырмын. Ол – қысқа мерзімді демалыс. Әрине, отбасымның ортасында болғым келеді, немерелерімді көрмегелі көп болды. Сонымен қатар, ем алу құқығымыз бар. Мүмкіндік болса, денсаулығыма көңіл бөлсем деймін, – деді Бейсембаев.
КАНИКУЛ
Айта кетейік, бүгін Қазақстандық депутаттар каникулға кетті.