АҚШ апелляциялық соты президент Дональд Трамп енгізген баж салығының басым бөлігі заңға сәйкес келмейді деп шешті, деп хабарлайды Ulysmedia.kz Reuters-ке сілтеме жасап.
ТОЛЫҒЫРАҚ
Дегенмен сот бұл тарифтердің күшін 14 қазанға дейін сақтап, Трамп әкімшілігіне Жоғарғы сотқа шағымдануға уақыт берді. Осылайша, сауда саясатының болашағы ең жоғарғы сот инстанциясында шешілмек.
– АҚШ апелляциялық соты жұма күні Дональд Трамптың баж салығының басым бөлігі заңсыз деп шешіп, республикашыл президенттің бұл құралды халықаралық экономикалық саясаттың негізгі тетігі ретінде пайдалануына соққы берді, — деп жазды Reuters.
Заңгерлердің айтуынша, бұл іс Жоғарғы соттағы ауқымды текетірестің бір бөлігіне айналуы мүмкін. Жақын күндері онда Федералдық резерв жүйесінің тәуелсіздігіне қатысты даулы іс те қаралмақ. Сарапшылар мұндай сәйкестікті елдің бүкіл экономикалық архитектурасына бұрын-соңды болмаған сын-қатер деп бағалап отыр.
Өз кезегінде Трамп сот шешіміне реакция білдіріп, оны “аса әділетсіз” деп атады. Truth Social желісіндегі жазбасында ол “Бұл тарифтер күшін жойса, ел үшін толық апат болады” деп жазды.
Еске салайық, биыл ақпанда Трамп БРИКС елдері халықаралық саудада доллардың рөлін әлсіретуге тырысса, оларға қарсы 100%-дық баж салығын енгіземін деп қоқан-лоқы жасаған еді. Бұған жауап ретінде Бразилия 2023 жылы ұсынылған ортақ валюта құру бастамасынан бас тартты. Ал тамыз айында Дональд Трамп Қазақстаннан келетін импортқа 25%-дық баж салығын енгізу туралы жарлыққа қол қойып, негізгі шикізат тауарларын бұл тізімнен алып тастады.