Ақтаудың мамандандырылған әкімшілік құқықбұзушылықтар жөніндегі сотының қаулысына сәйкес, қала прокуроры Ерболат Әбдіровтің іс-әрекеттерінде заң бұзушылық жоқ деп танылды, деп хабарлайды Ulysmedia.kz.
СОТ ШЕШІМІ
“Ақ Жайық” мәліметінше, сот Әбдіровтің Алматы әуежайында жасаған әрекеттерінде ҚР ӘҚБтК-нің 434-бабы 1-бөлігі бойынша (қоғамдық орындарда балағат сөз айту, азаматтарға тиісу және қоғамдық тәртіпті бұзу әрекеттері) әкімшілік құқықбұзушылық құрамы жоқ екенін анықтады.
Сотта куәлік еткен ағайынды азаматтар прокурормен арада ешқандай жанжал болмағанын, оған шағымдары жоқ екенін мәлімдеді. Сонымен қатар, сот автобустың қоғамдық көлікке жатпайтынын, арнайы қызметтік көлік екенін ескерді. Сараптама да Әбдіровтің әрекетке қабілетті, саналы күйде болғанын көрсетті.
ОҚИҒАНЫҢ ЖЕЛІСІ
Жағдай 27 тамыз күні болған еді. Әбдіров Алматы әуежайында жерлестері болып шыққан екі ағайындымен танысқан. Кейін ұшаққа апаратын автобустың ішінде белгілі бір оқиға болғаны туралы айтылған. 28 тамыз күні Алматы әуежайындағы полиция бөлімінің қызметкері прокурорға қатысты әкімшілік хаттама толтырған.
ҚАУЛЫ
10 қыркүйекте судья Иниятулла Досетов әкімшілік құқықбұзушылық құрамының болмауына байланысты істі тоқтатты. Сот қаулысына он күн ішінде Ақтау қаласының мамандандырылған әкімшілік соты арқылы Маңғыстау облыстық сотына апелляциялық шағым беруге болады.
КОНТЕКСТ
Еске салайық, 9 қыркүйекте Әбдіровтің ұсталғаны туралы ақпарат тараған еді. 10 қыркүйекте Маңғыстау облысының прокуратурасы оған қатысты қызметтік тергеу жүргізіліп жатқанын хабарлады.