Қазақстанда Ұлттық бірыңғай тестілеуді түбегейлі жаңарту жоспары қолға алынды. Бұл туралы Ғылым және жоғары білім министрі Саясат Нұрбек хабарлады.
ҰБТ ӘДІСТЕМЕСІН КІМ ӘЗІРЛЕЙДІ?
Министрдің айтуынша, Мемлекет басшысы АҚШ-қа сапары кезінде бүкіл әлем бойынша тест әзірлеу және бағалау саласында тәжірибесі мол Educational Testing Service (ETS) компаниясының атқарушы директоры Амит Севакпен кездесті.
–Қазіргі таңда біздің ҰБТ-ның сапасын күрт өзгерту, мазмұнын толыққанды қарастыру жұмысы осы ең ірі, ең беделді тестология орталығымен бірге жүзеге аспақ. Келесі айда үлкен зерттеушілер делегациясы келеді. Яғни бірнеше жылдың ішінде ҰБТ-ның сапасы мен мазмұны айтарлықтай өзгереді, – деді Саясат Нұрбек.
Жаңа үлгі халықаралық стандартқа сай әзірленіп, сұрақтардың сапасы мен ғылыми нақтылығы күшеймек.
Сондай-ақ, Президент Қасым-Жомарт Тоқаев Смитсонов институтының басшылығымен жолықты. Министр Саясат Нұрбектің сөзінше, "Болашақ" бағдарламасы аясында қазақстандық ғалымдар, тарихшылар, антропологтар мен мәдениеттанушылар Смитсонов институтында арнайы тағылымдамадан өту мүмкіндігіне ие болады.
ҚОЛДАНЫСТАҒЫ ҰБТ-НЫҢ ЕРЕЖЕЛЕРІ ҚАНДАЙ?
Қазақстанда Ұлттық бірыңғай тестілеудің негізгі ережелері 2017 жылы бекітілген. Кейінгі жылдары бұл талаптарға бірқатар өзгерістер енгізілді. Қазіргі формат бойынша тестілеу 5 пәннен тұрады: үшеуі – міндетті, екеуі – таңдау бойынша бейіндік пәндер. Барлығы 120 сұрақ беріледі. Қазақстан тарихынан – 20, математикалық сауаттылықтан – 10, оқу сауаттылығынан – 10, екі бейіндік пәннен – әрқайсысына 40 сұрақтан беріледі.
Емтиханға 4 сағат (240 минут) уақыт бөлінеді. Ерекше білім беру қажеттіліктері бар талапкерлерге қосымша 40 минут беріледі. Электронды және қағаз түрінде де тапсырылады.