Арқалық қаласындағы кафеде өткен тойдан кейін 85 адам уланған, деп хабарлайды Ulysmedia.kz.
АРҚАЛЫҚТАҒЫ АСТАН УЛАНҒАНДАР
"Наша газета" басылымының хабарлауынша, зардап шеккендер облыстың әртүрлі ауруханаларына жатқызылған. Әлеуметтік желіде тараған ақпаратқа сәйкес, той 60 жасқа толған туыстың құрметіне ұйымдастырылған.
Қостанай облыстық денсаулық сақтау басқармасы бұл деректі растады: 85 адам медициналық көмекке жүгінген, олардың үшеуі ғана ауруханаға жатудан бас тартқан. Басқарма басшысының орынбасары Айдана Бүркітбаеваның мәліметінше, Жангелдин аудандық ауруханасында – 27, Арқалықта – 52, облыстық ауруханада – 6 науқас жатыр. Зардап шеккендердің арасында бір жүкті әйел мен жеті бала бар. Барлық науқастың жағдайы қанағаттанарлық, өміріне қауіп жоқ.
«Санитарлық авиация желісі бойынша инфекционистер, терапевтер, педиатрлар және штаттан тыс мамандардан құралған арнайы бригада жіберілді», – деді Айдана Бүркітбаева.
Улану дерегі бойынша тергеу басталды. Кафенің қызметі уақытша тоқтатылып, азық-түлік пен ауыз судан сынамалар алынды, қызметкерлер тексерілді. Зерттеу нәтижелері әлі дайын емес. Полиция «Санитарлық ережелер мен гигиеналық нормативтерді бұзу» бабы бойынша қылмыстық іс қозғады.
Айта кетейік, биыл маусым айында Павлодарда да жаппай улану оқиғасы тіркелген. Ресми мәлімет бойынша, 67 адам ауырған, олардың көпшілігіне сальмонеллезді энтерит диагнозы зертханалық түрде расталған. 7 маусымдағы банкетте 45 адам, келесі күні тағы 22 адам уланған. 27 адам ауруханаға жатқызылып, қалғандары үй жағдайында емделген.