Салық кодексінде қай тармақты қайта қарамақ

Бұл тармақ компанияларға жеңілдетілген декларация негізінде жұмыс істейтін кәсіпкерлерден алынған қызметтерді шығын ретінде есептеуге мүмкіндік бермейді, бұл олардың бизнесіне қауіп төндіреді. Компаниялар бұл норманы креативті экономиканың дамуына елеулі кедергі деп санайды. Бұған дейін кәсіпкерлер билікке корпоративтік табыс салығы (КТС) бойынша шегерім құқығын сақтап қалу туралы өтініш білдірген болатын, себебі бұл шағын және орта бизнестегі B2B-байланыстардың бұзылуына әкелуі мүмкін.

САЛДАРЫ ҚАНДАЙ БОЛМАҚ

Авторлардың пікірінше, ОУР бойынша тапсырыс берушіге шегерім жасауға тыйым салу келесі салдарға алып келеді:

• Мұндай мердігерлерді ірі компаниялардың корпоративтік сатып алуларынан және ірі компаниялармен жұмыс істейтін жарнама агенттіктерінің сатып алуларынан шеттету;
• Нарықты бірнеше ірі жеткізушілер есебінен шоғырландыру, шағын және орта бизнесті ығыстыру және бағаның өсуі;
• Жеке кәсіпкерлер үшін – шегерімдер болмаған жағдайда 26–36% жиынтық жүктемемен (ЖТС 10% + ҚҚС 16% немесе КТС 20% + ҚҚС 16%) ОУР-ға мәжбүрлі түрде көшуге, не көлеңкелі экономикаға немесе нарықтан кетуге;
• Агенттіктер үшін – өзіндік құнның 20%+ өсуі және жобалық модельдің бұзылуы (мердігерлер пулының қысқаруы, икемділіктің төмендеуі, шығындардың артуы және табыстың азаюы);
• Нәтижесінде – жарнама агенттіктерінің тапсырыс берушілері үшін тауарлар мен қызметтердің түпкілікті өзіндік құнының өсуі, бұл халық үшін инфляцияның артуына тікелей әсер етеді.

– Жеңілдетілген режимдегі ЖК мен ЖШС – бұл шағын видеопродакшндар немесе видеографтар, дизайнерлер, фотографтар, копирайтерлер, режиссерлер, декораторлар және басқа да мамандар түріндегі шығармашылық бірліктер. Олар – креативті сектордың «қаңқасы», себебі елдегі бірде-бір агенттік әртүрлі жобаларға қажетті барлық мамандарды штатта ұстай алмайды және оларды жобаларға қарай тартады. Мұндай ЖК мен ЖШС-тің көпшілігінде шығындар бөлімі жоқ, сондықтан жеңілдетілген режим – заңды B2B-жұмыстың жалғыз тиімді форматы және көлеңкеден шығудың «лифті», – делінген өтініште.

ҰСЫНЫСТАР

• Заңды тұлғалар мен ОУР-дегі ЖК үшін жеңілдетілген режимдегі ЖК немесе ЖШС-ден сатып алынған қызметтерді шығын ретінде есептеу құқығын сақтау (шарт пен жабу құжаттары болған жағдайда);
• Өтемақы механизмі ретінде B2B-сегментте жұмыс істейтін ЖК үшін (бөлшек саудадағы 4%-ға қарсы) 6–8% мөлшеріндегі жеке жоғарылатылған салық мөлшерлемесін қарастыруға қайта оралу, жеңілдетілген режим мен шегерім құқығын сақтай отырып;
• ҚҚС шегін бірден екі есе емес, кезең-кезеңімен 10–25% аралығында 2–5 жыл ішінде төмендету, бұл бухгалтерлерді даярлау мен қайта даярлаумен қатар жүруі тиіс: бизнеске кадрлық ресурсты арттыру және қаржылық қауіпсіздік жастығын қалыптастыру үшін жеткілікті уақыт қажет.