Халықаралық су спорттары федерациясы мок ұсыныстарына қарамастан ресей мен беларусь спортшыларын командалық жарыстарға қатысуға рұқсат берді, деп хабарлайды Ulysmedia.kz.
WORLD AQUATICS ЕРЕЖЕЛЕРІ
Халықаралық су спорттары федерациясы (World Aquatics) Ресей мен Беларусь спортшыларын командалық жарыстарға қатысуға рұқсат беру туралы шешім қабылдады. Нейтралды мәртебесі бар спортшыларға турнирлерге қатысу ережелері 2025 жылғы 4 қарашада жарияланып, 2026 жылғы 1 қаңтардан бастап күшіне енеді.
ХОҚ ШЕКТЕУЛЕРІ
2023 жылғы наурызда Халықаралық Олимпиада комитеті Ресейдің Украинадағы агрессиялық соғысы жалғасып жатқанын ескеріп, ресейлік және беларусьтік спортшыларға халықаралық жарыстарға тек жеке тәртіпте, ұлттық рәміздерсіз қатысуға рұқсат беруді ұсынған болатын.
WORLD AQUATICS ЕРЕКШЕЛІГІ
World Aquatics — Халықаралық Олимпиада комитеті талаптарына қарамастан Ресей мен Беларусь үшін командалық жарыстарға жол ашқан алғашқы ірі халықаралық федерация. Жаңартылған ережелерде нейтралды тумен қатысатын спортшыларға арналған шектеулер тізімінен су добындағы командалық жарыстарға қатысуға тыйым алынып тасталды. Сонымен қатар, ресейлік және беларусьтік спортшылар жүзу, трамплиннен секіру секілді жеке спорт түрлеріне нейтралды мәртебеде қатыса алады.
ОЛИМПИАДА-2026
2025 жылғы 19 қыркүйекте Халықаралық Олимпиада комитеті төрайымы Кирсти Ковентри Миландағы атқару комитетінің отырысынан кейінгі баспасөз мәслихатында Ресей спортшылары 2026 жылғы қысқы Олимпиада ойындарына (Милан және Кортина-д’Ампеццо) тек нейтралды тумен қатыса алатынын мәлімдеді. Бұл ереже Беларусь спортшыларына да қатысты болады.
Ресей мен Беларусь хоккей, керлинг секілді командалық спорт түрлерінде құрамалар шығара алмайды. Ал жеке спортшылардың қатысуы халықаралық спорт федерацияларының шешіміне байланысты болады.
ПАРИЖ-2024
Бұған дейін Халықаралық Олимпиада комитеті мұқият тексеруінен кейін Ресей мен Беларусьтен аздаған спортшылар 2024 жылғы жазғы Олимпиадаға (Париж) нейтралды мәртебеде қатысуға рұқсат алған болатын.
2023 жылғы қазанда МОК Ресей Олимпиада комитетінің мүшелігін тоқтатты. Себебі ресейлік тарап Украинадағы оккупацияланған аумақтар — Луганск, Донецк, Херсон және Запорожье облыстарындағы «аймақтық олимпиадалық кеңестерді» мойындаған.
ХОҚ ЖАҢА БАСШЫСЫНЫҢ ҰСТАНЫМЫ
2025 жылғы наурызда Халықаралық Олимпиада комитеті жаңадан сайланған басшысы — жүзуден екі дүркін Олимпиада чемпионы және Зимбабвенің спорт, демалыс, өнер және мәдениет министрі Кирсти Ковентри — халықаралық қақтығыстарға байланысты мемлекеттерді Олимпиада ойындарынан шеттетуге қарсы пікір білдірді.