Еңбек және халықты әлеуметтік қорғау министрлігі 2026 жылы шетелдік жұмыс күшін тартуға арналған квотаны белгілеу туралы бұйрықтың жобасын дайындады, деп хабарлайды Ulysmedia.kz.
ТОЛЫҒЫРАҚ
Құжатта елдегі жалпы жұмыс күшінің 0,25%-ы деңгейінде шек белгілеу ұсынылады. Тиісті ақпарат «Ашық НҚА» порталында жарияланған.
Министрлік сондай-ақ жеке тұлғалар жалдайтын шетелдік жұмысшыларға қатысты көлемді сақтауды ұсынып отыр. Бұл санат үшін квота 2,9% деңгейінде қалдыру көзделген.
Бұйрық жобасы қоғамдық талқылауға шығарылды және оған 5 желтоқсанға дейін пікір қалдыруға болады.
АНЫҚТАМА
Шетелдік мамандарды тарту квотасын министрлік ішкі еңбек нарығын қорғау үшін жыл сайын белгілейді. 2025 жылы жалпы лимит жұмыс күшінің 0,2% деңгейінде (14,8 мың адам) болған, алайда кейін өңірлердің сұранысына байланысты 16,5 мыңға дейін ұлғайтылған.
Биылғы тамыздан бастап маусымдық кәсіптер тізімінің кеңеюіне байланысты квота 0,25% деңгейіне (19,4 мың бірлік) қайта көтерілді.
1 қазан күнгі мәлімет бойынша, Қазақстанда 14 666 шетелдік маман жұмыс істейді.