Қызылорданың «Қайсар» футбол клубы жаңа маусымға дайындықты жалғастырып жатыр. Команданың ең көзге түскен жаңа ойыншыларының бірі – Еуропаның жетекші чемпионаттарында өнер көрсеткен нигериялық жартылай қорғаушы Виктор Мозес, деп хабарлайды Ulysmedia.kz.
ҚАРЖЫЛЫҚ ШАРТТАР
Sports24.kz мәліметінше, Виктор Мозес «Қайсар» сапында айына шамамен 8 миллион теңге табыс табады. Жылдық кірісі шамамен 160 мың АҚШ долларына тең болады.
КӘСІБИ МАНСАП ЖОЛЫ
Виктор Мозес кәсіби мансабын Англия Чемпионшип лигасында «Кристал Пэлас» клубынан бастады. Кейін «Уиган Атлетикке» ауысып, 2010 жылы Англия Премьер-лигасында дебют жасады. 2012 жылы футболшы Лондонның «Челси» клубымен келісімшартқа қол қойды.
Әр жылдары нигериялық хавбек «Ливерпуль», «Вест Хэм Юнайтед», «Фенербахче», «Интер» және Мәскеудің «Спартак» клубтарында ойнады. Соңғы клубы – «Лутон Таун». Ол бұл команда сапында Чемпионшипте 18 матч өткізіп, бір гол соқты.
СТАТИСТИКА ЖӘНЕ ЖИНАЛҒАН ТӘЖІРИБЕ
Өз мансабында Виктор Мозес 495 ойынға қатысып, 62 гол соқты және 47 нәтижелі пас берді. Нигерия ұлттық құрамасы сапында 38 матч ойнап, 12 гол соғып, 5 голдық пас берген.