Жоғары аудиторлық палата Алматы қаласында бюджет қаражаты мен мемлекеттік активтердің пайдаланылу тиімділігіне аудит жүргізіп, тексеру қорытындысын жариялады. Мемлекеттік аудит 2024 жылғы 1 қаңтар мен 17 қыркүйек аралығын қамтыған, деп хабарлайды Ulysmedia.kz.
ТОЛЫҒЫРАҚ
Аудит нәтижесі ҚР Жоғары аудиторлық палатасының отырысында қаралған. Палата мәліметінше, Алматы – елдегі ең ірі экономикалық орталықтардың бірі. Қалада Қазақстан халқының 11 пайыздан астамы тұрады және ол жалпы ішкі өнімнің шамамен 22 пайызын қалыптастырады. Алайда қала экономикасы әлі де сауда мен қызмет көрсету саласына тәуелді болып отыр, ал өндірістік және инновациялық секторлардың дамуы баяу.
КЕМШІЛІКТЕР
Тексеру барысында жоспарлау, басқару және бақылау жүйесінде бірқатар кемшілік анықталған. Атап айтқанда, 2021–2025 жылдарға арналған Алматы қаласының даму жоспары бірнеше рет өзгертілгеніне қарамастан, тиімді басқару құралына айналмаған. Аудиторлар жоспарланған іс-шаралардың толық қаржыландырылмауын тіркеген, бұл бірқатар нысаналы көрсеткіштерге қол жеткізуге мүмкіндік бермеген.
ТҰРҒЫН ҮЙ
Бюджеттік инвестициялық жобалардың саны 2022 жылғы 365-тен 2025 жылы 529-ға дейін артқанымен, оларды іске асыруда елеулі проблемалар бар. Мысалы, Жас Қанат шағын ауданында 41 көпқабатты үй салу жобасы аясында 7 тұрғын үйдің құрылысы аяқталмаған, ал тағы 12 үй абаттандыру жұмыстары жүргізілмегендіктен коммуналдық меншікке берілмеген.
СУБСИДИЯЛАР
Сондай-ақ Қалалық мобилділік басқармасының қызметіне қатысты да заңбұзушылықтар анықталған. 2022–2025 жылдары тасымалдаушыларға 2,3 млрд теңге көлемінде негізсіз субсидия төленген.
Аудит Жер қатынастары басқармасының жер телімдерін бөлу кезінде ашықтықты арттырып, олардың нысаналы пайдаланылуына бақылауды күшейтуі қажет екенін көрсетті. Құрылыс тығыздығының сақталмауы инженерлік және көлік инфрақұрылымына түсетін жүктемені арттырып, тұрғындардың әлеуметтік нысандарға қолжетімділігін төмендеткен.
«Алматы» әлеуметтік-кәсіпкерлік корпорациясының жұмысы да тиімсіз деп танылды. Аудиторлардың мәліметінше, тұрғын үй құрылысына бағытталған шамамен 30 млрд теңге көлеміндегі бюджеттік инвестиция үш жылға жуық игерілмей қалған. Сонымен қатар корпорация азық-түлік бағасын тұрақтандыру міндетін толық орындай алмаған, ал бюджеттік кредиттер тиімсіз пайдаланылып, қаржы құралдарына орналастырылған.
БҰЗУШЫЛЫҚТАР
Жалпы аудит қорытындысы бойынша 203 млрд теңгеден астам қаржылық бұзушылық анықталған. Тексеру барысында оның 26 млрд теңгеден астамы өтеліп, тағы 83 млрд теңгеден астамы есепке алу және орындалған жұмыстар арқылы қалпына келтірілген.
Әкімшілік құқық бұзушылық белгілері бар 417 дерек бойынша материалдар уәкілетті органдарға жолданған.
Жоғары аудиторлық палата анықталған заңбұзушылықтарды жою, стратегиялық жоспарлауды жетілдіру, активтерді басқару мен бюджеттік тәртіпті күшейту бойынша Алматы қаласы әкімдігіне тиісті тапсырмалар мен ұсынымдар берді.