Қазақстан Германияға жіберілуі тиіс болған мұнайды Ресей аумағы арқылы өтетін басқа бағыттарға жөнелтеді, деп хабарлайды Ulysmedia.kz.
260 МЫҢ ТОННА МҰНАЙ ҚАЙТА БӨЛІНДІ
Қазақстан Энергетика министрлігі мәліметінше, Ресей 1 мамырдан бастап «Достық» құбырының солтүстік тармағы арқылы Қазақстан мұнайының Германияға транзитін тоқтататындықтан, экспортқа жоспарланған көлем қайта бөлінген.
Әңгіме 260 мың тонна мұнай туралы болып отыр. Оның 160 мың тоннасы Каспий құбыр консорциумы жүйесі арқылы жөнелтіледі. Ал қалған 100 мың тоннасы Ресей аумағындағы Усть-Луга портына бағытталады.
«Достық» құбыры секілді бұл екі бағыт та Ресей аумағы арқылы өтеді.
Бұл өзгеріс туралы пікір білдірген энергетика министрінің кеңесшісі әрі ресми өкілі Әсел Серікпаева мұнай тасымалының қайта бағытталуы жүк жөнелтушілермен келісілгенін және тек операциялық сипатқа ие екенін айтты.
“Маршруттың өзгеруі жылдық өндіріс жоспарына әсер етпейді. Қолданыстағы инфрақұрылым Қазақстанға экспортты толық көлемде тұрақты жүргізуге және әлемдік нарықтарға мұнай жеткізуді үздіксіз қамтамасыз етуге мүмкіндік береді”, – деді ол.
ТАСЫМАЛ НЕГЕ ТОҚТАДЫ?
Қазақстан билігі 1 мамырдан бастап Ресей тарапынан Қазақстан мұнайын Германиядағы Шведт мұнай өңдеу зауытына тасымалдау тоқтатылатынын растаған. Бұл шешім «Достық» құбырының солтүстік тармағындағы жөндеу жұмыстарына байланысты болуы мүмкін.
Ресей тарапы Қазақстан мұнай экспортын басқа бағыттарға бұруға уәде берген. Ал Германияда Шведт зауыты шикізат тапшылығына ұшырауы мүмкін деген болжам айтылған.