Алматының Алмалы ауданында 40 жастағы әйел көз жұмды. Кейін тергеушілер оның пәтерінен хат тапты. Ол оны өлер алдында жазған болуы мүмкін, деп хабарлайды Ulysmedia.kz.
Мән-жай
Полицияның алдын ала мәліметінше, әйел өзі тұрған үйдің тоғызыншы қабатынан құлаған. Оқиға орнына барған жедел-тергеу тобы пәтерді тексеру барысында іс үшін маңызды бірқатар материалды, соның ішінде хатты тапқан. Қазір оның мазмұны зерттеліп жатыр.
Полиция бұл дерек бойынша кешенді тергеу шаралары жүргізіліп жатқанын растады.
Тергеушілер нені анықтап жатыр?
Қазір құқық қорғау органдары оқиғаның толық мән-жайын қалпына келтіріп, қайғылы жағдайға не себеп болғанын анықтауға тырысып жатыр. Сондай-ақ, марқұмның өмір салты, араласқан ортасы және оқиғаға дейінгі басқа да жағдайлар зерделеніп жатыр.
Тексеру қорытындысы бойынша процестік шешім қабылданады.