Қазақстанның QR-коды арқылы Қытайда төлем жасауға болады

QR жүйесі ортақ болады

Бұл туралы Қазақстан Ұлттық банкі қазақстандық делегацияның Қытайға сапарының қорытындысы бойынша хабарлады. Астанадан сапарға Ұлттық банк пен Қаржы нарығын реттеу және дамыту агенттігінің өкілдері қатысты.

– ҚР Ұлттық Банкінің Ұлттық төлем корпорациясы мен UnionPay International (UPI) – China UnionPay-дің өнімдері мен қызметтерін халықаралық дамытуға жауапты жаһандық бөлімшесі арасындағы меморандумды іске асыру аясында жыл соңына дейін елдеріміз арасындағы QR-төлемдерді интеграциялау жүзеге асырылады, – деп хабарлады Ұлттық банк.

Осылайша, Қытайдың UnionPay төлем жүйесіне қосылған карталардың иелері Қазақстанда QR-код арқылы төлем жасау мүмкіндігіне ие болуы ықтимал.

Ал Қазақстанның ішкі банкаралық QR жүйесі арқылы Қытайда төлем жасау мүмкіндігі қаншалықты кең болатынын Ұлттық банк әзірге нақтылаған жоқ.

Бейжіңде тағы не талқыланды?

Бірыңғай QR жүйесі бойынша келісімдерден бөлек, қазақстандық делегация Қытайда валюталық своп туралы келісімге қол қойды. Бұл құжат екіжақты сауданы дамытуға және өзара есеп айырысуда ұлттық валюталарды кеңірек пайдалануға мүмкіндік береді.

Келіссөздер барысында сондай-ақ Қазақстанның мемлекеттік облигацияларын юаньмен шығару, цифрлық валюталар саласындағы ынтымақтастықты кеңейту және төлем инфрақұрылымын дамыту мәселелері талқыланды.

Атап айтқанда, Қытай Халық банкі мен Қазақстан Ұлттық банкі цифрлық теңге және цифрлық юань арқылы есеп айырысуды іске қосуға уағдаласты.

Сонымен қатар Қытай банктері Қазақстандағы маңызды инвестициялық жобаларды қаржыландыра алады.

– Қазақстандық делегация бөлек Алатау қаласының инвестициялық жобаларын іске асыруға және қаржылық экожүйесін дамытуға қытайлық серіктестерді белсенді қатысуға шақырып, осы бағыттағы жобаларды таныстырды, – деп толықтырды Ұлттық банк.

Бұған дейін реттеуші бірыңғай банкаралық QR жүйесін пайдаланғаны үшін бизнеске алынатын комиссияларды әділ етуге күш салатынын мәлімдеген еді.