Каспий құбыр консорциумының теңіз терминалында қазақстандық мұнайды танкерлерге тиеу қайта жанданды. Алайда Қара теңіздегі танкерлерге жасалған шабуылдар тоқтамаса, экспорт қайтадан тоқтатылуы мүмкін, деп хабарлайды Ulysmedia.kz.
Мән-жай
PACE Analytics сараптамалық компаниясының директоры Асқар Исмайыловтың айтуынша, қазір КҚК теңіз терминалындағы резервуарлар танкерлердің мұнайды алып кету жылдамдығынан әлдеқайда тез толып жатыр.
Бұл Қазақстан мұнайының экспортына байланысты кезекті проблемаларға және елдегі ірі кен орындарында мұнай өндіру көлемінің төмендеуіне әкелуі мүмкін.
– 1 тамыздан бастап КҚК тәулігіне 100 мың тонна мұнайды резервуарларға қабылдап жатыр. Теңіз терминалындағы резервуарлардың жалпы сыйымдылығы шамамен 800-850 мың тонна. Қазіргі қабылдау қарқыны мен танкерлермен мұнайды тиеудің баяу жүруін ескерсек, бос орын екі-үш күн ішінде таусылуы мүмкін, – деп ескертті Асқар Исмайылов.
Егер резервуарлар толып қалса, КҚК қазақстандық мұнайды қабылдауды қайта тоқтатуға мәжбүр болады. Мұндай жағдай бұған дейін де болған.
Бұл Теңіз, Қашаған және Қарашығанақ кен орындарында мұнай өндіру көлемінің қайта төмендеуіне әкелуі мүмкін.
Осы үш кен орны мұнайды КҚК инфрақұрылымы арқылы экспортқа шығарады және Қазақстанның экспорттық кірісінің басым бөлігін қамтамасыз етеді.
Тәуекел факторы
Энергетика министрлігі КҚК терминалы арқылы мұнай айдауды толық тоқтату мәселесі қарастырылып жатпағанын мәлімдеді.
Алайда сарапшының айтуынша, танкерлерге қатысты проблемалар жалғаса берсе, КҚК Қазақстан мұнайының экспортын қамтамасыз етуге техникалық тұрғыдан үлгермеуі мүмкін.
Осы уақытта Новороссийск маңындағы КҚК теңіз терминалынан танкерлерге мұнай тиеу Қара теңізде кемелерге жасалған бірнеше шабуылдан кейін біртіндеп қалпына келе бастағаны белгілі болды.
Кейінгі бірнеше күнде төрт танкерге қазақстандық мұнай тиелген. Тағы кемінде үш кеме мұнай тиеуді күтіп тұрған.
Соған қарамастан, дрондардың жаңа шабуыл жасау қаупі әлі де бар.