Алдын ала мәлімет бойынша, Eurasian Resources Group (ERG) компаниясындағы мемлекетке тиесілі акциялар «Самұрық-Қазына» ұлттық әл-ауқат қорының басқаруына өткен, деп хабарлайды Ulysmedia.kz.
Жаңа меншік иесі
Бұл ақпаратты қаржы сарапшысы Арман Батаев өзінің дереккөздеріне сілтеме жасап хабарлады. Оның айтуынша, ERG-нің мемлекетке тиесілі 40 пайыз акциясы 4 тамызда «Самұрық-Қазынаның» иелігіне өткен.
– Биыл маусымда «Самұрық-Қазына» республикалық мүлікті алу үшін 1,4 млрд долларға өз акцияларын орналастыру туралы шешім қабылдады. Сол кезде бұл мемлекетке тиесілі ERG-нің 40 пайыз акциясына қатысты болуы мүмкін деп болжаған едім, – деді Батаев.
Бұл ақпарат расталса, ERG активтері бұрынғыдай мемлекет меншігінде қалады. Алайда енді оларды басқару квазимемлекеттік компанияның бақылауына өтеді.
Сондай-ақ кейін бұл акциялар пакетінің қордың еншілес құрылымдарының бірінің басқаруына берілуі мүмкін екені айтылып отыр. Атап айтқанда, тау-кен металлургия саласындағы активтерді шоғырландыратын «Тау-Кен Самұрық» ұлттық компаниясы болуы мүмкін.
Әзірше бұл ақпаратқа қатысты ресми растау немесе терістеу болған жоқ.
ERG төңірегіндегі жағдай
Мамыр айының соңында Integra Construction KZ компаниясының иесі Шахмұрат Мұтәліп Eurasian Resources Group акцияларының шамамен 40 пайызын сатып алған болатын.
Кейін компанияның Қазақстандағы және халықаралық активтерін бөліп, екі дербес компания құруы мүмкін екені туралы ақпарат тарады. Алайда бұл болжамды Өнеркәсіп және құрылыс министрлігі жоққа шығарды.