21 жастағы Диана 29 маусымда Алматы облысының Ұзынағаш ауылындағы ерлер дәретханасынан өлі күйінде табылған. Полиция қылмыстық істі суицидке итермелеу бабы бойынша тергеп жатыр. Алайда марқұмның туыстары оның өзіне өзі қол жұмсағанына күмән келтіріп отыр, деп хабарлайды Ulysmedia.kz.
Толығырақ
Туыстарының айтуынша, қайғылы оқиға болған күні Диана анасымен бірге уақыт өткізген. Ол анасына сыйлықтар жасап, сұлулық салонына апарып, концертке билет сатып алған. Жұмыстан кейін қыз ағасының үйіне бармақ болған. Алайда түнде кенеттен қоңыраулар мен хабарламаларға жауап бермей қойған.
Жақындарының сөзінше, Диананың денесінен көгерген және соққы іздері байқалған. Сонымен қатар қыз қайтыс болғаннан кейін оның 100 мың теңгесі мен алтын алқасы табылмаған. Кейін отбасы Диананың кейбір жеке заттарын өздері жырадан тауып, тергеушіге тапсырған.
Марқұмның құрбылары Threads желісінде Диананың өзін аңдыған ер адам туралы жазған хаттарының скриншоттарын жариялаған. Онда қыз оның әрекеті күдік тудырғандықтан, онымен қарым-қатынасын тоқтатқанын айтқан. Алайда содан кейін ер адам оған жазуын жалғастырып, мазалаған.
Туыстары оқиғаға қатысты болуы мүмкін куәгер туралы да айтты. Олардың сөзінше, қайғылы жағдайға дейін көп ұзамай дәретхананың маңынан екі көлік пен төрт жас жігіт көзге түскен.
Полиция не дейді?
Алматы облысы полиция департаментінің мәліметінше, Қазақстан Қылмыстық кодексінің 105-бабы — «Өзін-өзі өлтіруге дейін жеткізу» бойынша қылмыстық іс қозғалған.
Тергеу жалғасып жатыр. Полиция қыздың өліміне қатысты барлық мән-жайды анықтап жатыр.