Қазақстан мен Ресей президенттері Қасым-Жомарт Тоқаев пен Владимир Путин БРИКС саммиті өтіп жатқан Нью-Делиде бейресми кездесу өткізді, деп хабарлайды Ulysmedia.kz.
Ресейлік БАҚ мәліметінше, мемлекет басшылары мен делегацияларға арналған салтанатты қабылдаудан кейін Владимир Путин Қасым-Жомарт Тоқаевты Үндістандағы резиденциясына шақырған.
Кремль екі президенттің кездескенін растады. Ресей президентінің баспасөз хатшысы Дмитрий Песков мұндай ұсыныс саммит барысында туғанын айтты.
– Президент Тоқаевты бейресми жағдайда еркін әңгімелесуге шақырды, – деді Песков.
БРИКС саммиті 12-13 қыркүйекте өтіп жатыр. Оған ұйымға мүше елдердің басшылары мен өкілдері, серіктес мемлекеттер және халықаралық ұйымдардың өкілдері қатысып жатыр.
Қасым-Жомарт Тоқаев Нью-Делиге бір күн бұрын келді. Әуежайда Мемлекет басшысын Үндістан үкіметінің өкілдері қарсы алды. Қазақстандық делегацияның құрметіне ұлттық би көрсетіліп, құрмет қарауылы сап түзеді.
Қазақстан Президенті сапар барысында «аутрич»/«БРИКС+» форматындағы жалпы отырыста сөз сөйлейді деп жоспарланған.
Сонымен қатар, Мемлекет басшысының бірқатар екіжақты кездесуі өтпек.
Саммитке Владимир Путин, Си Цзиньпин, Масуд Пезешкиан, Сирил Рамафоса және Әбу-Дабидің тақ мұрагері Халед бен Мұхаммед бен Заид Әл Нахаян да қатысып жатыр.