Тұрғындарға өтемақы төленетіні айтылған, алайда әзірше тым-тырыс. Екінші жыл қатарынан халық қалыпты ауызсу, газ және электр қуатынсыз отыр. Ал реновация жұмыстарын тек 2030 жылға дейін аяқтау жоспарланған, деп хабарлайды Ulysmedia.kz.
Мән-жай
Шымкентте тозығы жеткен және апатты үйлердің тұрғындарын жаппай көшіру жалғасып жатыр. 2030 жылға дейін қалада тағы 66 көпқабатты үйді, яғни 604 отбасын қоныстандыру жоспарланған. Жаңа баспана «бөлмеге бөлме» қағидаты бойынша беріледі. Бұл ретте жаңа пәтерлердің шаршы метрі, әдетте, бұрынғысынан көбірек болады.
Қоныс аудару жұмыстары Көксай шағынауданында белсенді жүріп жатыр. Ондағы 23 көпқабатты үйдің 15-інде бағдарлама орындалған.
Жаңа қоныстанушылардың қатарында Қаршыға Әлімова да бар. Ол он жыл бойы апатты үйден көшуді армандаған.
— Ескі пәтерімнің аумағы небәрі 24 шаршы метр еді, үй апатты жағдайда болатын. Ал жаңа пәтерімнің аумағы – 41 шаршы метр. Маған бәрі қатты ұнайды, — деді ол.
Алайда бір тұрғындар жаңа пәтерлердің кілтін алып жатса, енді бірі үйлердің бұзылуынан кейінгі қиындықтарды бастан кешіп отыр.
Көршілес жеке сектордың тұрғындары су, электр қуаты мен газдың жиі өшетінін айтып шағымданып жатыр.
— Мұнда үйлерді бұзып жатқанына екінші жыл болды, ал жеке сектор сол күйі қалды. Бізге үйлеріміз үшін өтемақы төленетіні айтылған еді, бірақ әзірше тым-тырыс. Үйлердің бұзылуына байланысты судың сапасы нашарлады, жарық пен газды үнемі өшіреді. Қыста не болатынын білмеймін, — деді Ильсия Шафигуллина есімді тұрғын.
Жеке секторға қатысты мәселе әзірше шешілмеген. Жүргізілген түгендеу барысында көптеген үй иесінің құжаттары толық рәсімделмегені, ал кейбір құрылыстардың мүлде заңдастырылмағаны анықталған.
Реновация бағдарламасын жеке инвесторлардың қаражаты есебінен жүзеге асыру жоспарланып отыр. Қазірдің өзінде үш компания қызығушылық танытқан.
Егер тозығы жеткен басқа үйлердің тұрғындары да бағдарламаға қосылғысы келсе, нысандардың тізімі кеңейтілуі мүмкін, деп мәлімдеді Шымкент қаласының құрылыс басқармасы.