Қонаевта кеше кешкі уақытта көлік қағып кеткен бала көз жұмды. Қайғылы оқиғадан кейін қала тұрғындары жолдардың жағдайына шағымданып жатыр. Олардың айтуынша, балалар тротуар болмағандықтан, көлік жүретін жолмен жүруге мәжбүр, деп хабарлайды Ulysmedia.kz.
Оқиға қалай болды?
Полицияның мәліметінше, жол апаты 20 қыркүйек күні сағат 18:40 шамасында болған. Hyundai көлігін мінген 22 жастағы жүргізуші жолдың жүріс бөлігінде болған кәмелетке толмаған баланы қағып кеткен. Алған жарақатынан бала оқиға орнында көз жұмды.
Жүргізушіге қатысты қылмыстық іс қозғалды. Қазір ол уақытша ұстау изоляторында отыр. Тергеушілер жол апатының мән-жайын анықтап жатыр.
Балалар жолмен жүруге мәжбүр
Threads желісінде тұрғындар қайғылы оқиға 10-шағынауданда болғанын жазды. Қала тұрғындары бұл жерде талапқа сай тротуарлар мен балалар алаңдарының жоқтығына шағымданған.
– Жолдың жөнделмегеніне қанша жыл болды! Жөндейді де, кейін шұрық-тесік күйінде қалдырады. Көліктер шұңқырларды айналып өту үшін жолдың шетіне шығады. Шағынаудан өсіп жатыр, бірақ ештеңе жоқ. Жарықтандыру жүргізу үшін әрең дегенде қол жеткіздік. Адамдар бұл мәселелерді қанша жылдан бері айтып келеді! Бізде қайғылы жағдай болмайынша, ешкім қозғалмайды! – деп жазған тұрғындар.
Осыған ұқсас шағымдар Железнодорожная көшесінен де түсіп жатыр. Тұрғындардың айтуынша, бұл жерде де тротуарлар мен веложолдар жоқ. Ал көшенің бойында бірнеше зауыт орналасқандықтан, жұмысшылар жол жиегімен жүруге мәжбүр.