Жыл басынан бері Солтүстік Қазақстан облысына 129 этникалық қазақ көшіп келген. Алайда енді қандас мәртебесін алғысы келетіндерге бірнеше тексеруден өтуге тура келеді, деп хабарлайды Ulysmedia.kz.
Отанына оралып, бәрін басынан бастады
24.kz мәліметінше, қаңтар айынан бері СҚО-ға Ресей, Өзбекстан, Моңғолия, Қытай, Тәжікстан және Ираннан 48 отбасы көшіп келген.
Бұған дейін көшіп келгендердің бірі – Айбаршын Құдайбергенова. Екі жыл бұрын ол отбасымен Өзбекстаннан Бескөл ауылына келген. Қазір әйел Отбасын қолдау орталығында психолог болып жұмыс істейді және басқа қандастардың жаңа ортаға бейімделуіне көмектеседі.
– Біз бұл жерге тарихи отанымызға оралып, балаларымыздың Қазақстанда өмір сүріп, осында өскенін қалағандықтан көшіп келдік. Бізге қажетті қолдау көрсетілді. Тұрғын үй алуға жәрдемдесті. Барлық төлемді алдық, жұмысқа орналастық. Ал қандас мәртебесі бар қызымыз университетке грантқа түсті, – дейді ол.
Қоныс аударушыларға мемлекет көшуге қаражат және 7 миллион теңгеге дейін тұрғын үй сертификатын береді.
Жаңа талаптар
Енді қандас мәртебесін алу қиындай түсті. Үміткерлер құжат жинап қана қоймай, қазақ тілін білетінін растауы, сауалнама толтырып, әңгімелесуден өтуі керек.
– Бірінші кезең – Qaztest. Өтініш беруші дұрыс жауаптардың кемінде 70 пайызын жинауы қажет. Сертификат алғаннан кейін өтініш беруші сауалнамадан өте алады, – деп түсіндірді облыстық жұмыспен қамтуды үйлестіру және әлеуметтік бағдарламалар басқармасының бас маманы Назерке Тасқұлова.
Тіл емтиханынан кейін кандидат арнайы порталдағы сауалнаманы толтырады. Жүйе оның жасы, білімі, денсаулығы, тіпті Қазақстанда туыстарының бар-жоғын да бағалайды.
Келесі кезеңге өту үшін кемінде 600 балл жинау қажет. Одан кейін құжаттарды мемлекеттік органдар тексереді. Ал үміткердің өзі қорытынды әңгімелесуге шақырылады.
Салалық басқарма жаңа талаптардың енгізілуін көші-қон үдерісін ел экономикасы үшін тиімдірек ету мақсатымен түсіндіреді.