Дүйсенбіде мұнай бағасы төмендей бастады. Нарыққа Таяу Шығыстан жеткізілім көлемінің артуы және G7 елдерінің стратегиялық қорларының бір бөлігін нарыққа шығару туралы шешімі қатар әсер етіп отыр, деп хабарлайды Ulysmedia.kz.
Гринвич уақытымен сағат 02:40-та Brent маркалы мұнай фьючерстері 66 цент, яғни 0,65% арзандап, барреліне 101,59 доллар болды. Америкалық WTI мұнайы 95 цент немесе 1,03% төмендеп, барреліне 90,12 доллардан сатылды. Осылайша Brent алдыңғы аптадағы өсімінің басым бөлігін жоғалтса, WTI бағасы 1,6% төмендеді.
Толығырақ
Reuters агенттігінің хабарлауынша, жұма күні «Үлкен жетілік» елдері төтенше резервтерден 100 млн баррель дизель отыны мен шикі мұнайды нарыққа шығаруға келісті. Сонымен қатар олар энергия тасымалдаушылардың экспортына шектеу қоймауға уәде берді. Бұл шешім АҚШ президенті Дональд Трамптың қысымынан кейін қабылданды.
Сонымен бірге Таяу Шығыстан мұнай жеткізу көлемі де артып келеді. Теңіз тасымалы бойынша деректерге қарағанда, қыркүйектің соңғы аптасындағы жеті күннің төртеуінде мұнай экспорты соғысқа дейінгі деңгейден асып түскен. Бұл Ормуз бұғазы арқылы өтетін кемелерге жасалған шабуылдарға қарамастан орын алды.
KCM Trade сарапшысы Тим Уотерердің айтуынша, G7 елдерінің стратегиялық қорларды пайдалану туралы шешімі мұнай жеткізіліміне қатысты алаңдаушылықты біршама бәсеңдеткен. Сонымен қатар Сауд Арабиясының мұнай экспорты соғысқа дейінгі деңгейге қайта оралып жатқаны туралы пікір күшейіп келеді. Алайда бұл мұнайды тасымалдау әлі де қымбатқа түсіп, тиімділігі төмен бағыттар арқылы жүзеге асырылып жатыр.
Әзірше осы факторлар мұнай бағасының өсуін тежеп отыр. Дегенмен Парсы шығанағындағы энергетикалық инфрақұрылымға жаңа залал келу қаупі сақталып отыр.
Мұнай нарығына төнген қауіп әлі сейілген жоқ
Хуситтер Эр-Рияд пен Хурайс аймағындағы Saudi Aramco нысандарына баллистикалық зымырандар мен дрондар арқылы шабуыл жасағанын мәлімдеді. Олардың айтуынша, бұл шабуыл Сауд Арабиясы бастаған коалицияның кейінгі 12 сағат ішінде Йеменге жасаған 50 әуе және зымыран соққысына жауап болған.
Осыған байланысты Сауд Арабиясы қолдайтын әрі халықаралық деңгейде мойындалған Йемен үкіметі қазіргі уақытта Иран қолдайтын хуситтердің бақылауындағы аумақтарды қайтару үшін ауқымды әскери операция басталғанын жариялады.
Сонымен қатар Saudi Aramco Азиядағы сатып алушылар үшін қараша айындағы мұнай бағасын күтпеген жерден кейінгі алты жылдағы ең төменгі деңгейге түсірді.
Қазіргі төмендеуге қарамастан, Brent бағасы барреліне 100 доллардан жоғары болып отыр. ING сарапшылары мұнай бағасының жоғары болуын геосаяси шиеленістің сақталуымен және Парсы шығанағындағы коммерциялық кемелерге жасалған шабуылдардың жиілеуімен байланыстырады.