Ақтөбеде мүгедектігі бар адамдардың құқықтарын қорғау, медициналық көмектің қолжетімділігі және әлеуметтік төлемдер мәселелеріне арналған бейбіт митинг өтеді. Қала әкімдігі акцияны өткізуге келісім берген. Бұл ақпаратты Ulysmedia.kz тілшісіне қалалық ішкі саясат бөлімінің өкілдері растады.
Митинг туралы не белгілі?
Акция 3 желтоқсанда «Авиатор» саябағында өтеді деп жоспарланған. Митинг өткізуге өтінішті жергілікті тұрғын Мұсағали Дауылов берген.
Акцияны өткізуге рұқсат берілгені туралы ақпарат бастапқыда белсендінің Facebook парақшасында жарияланған. Алайда қазір бұл жазба оның парақшасында жоқ. Ulysmedia.kz тілшісі ақпаратты нақтылау үшін қала әкімдігіне хабарласқан.
Қалалық әкімдіктің ішкі саясат бөлімінің басшысының орынбасары Нұралы Серғалиұлы митинг өткізуге шынымен рұқсат берілгенін растады.
– Иә, рұқсат берілді. 10 қазанда тұрғын Мұсағали Дауылов өтініш тапсырды. Өтініш үш күн қаралды. Кеше мақұлданды, – деді ол.
Митингке қатысушылар қандай мәселелерді көтермек?
Митингке қатысушылар мүгедектігі бар адамдардың проблемаларына назар аударуды көздейді. Олар медициналық көмек пен оңалту қызметтерінің қолжетімділігін арттыруды талап етпек.
Сондай-ақ мүгедектігі бар балалардың білім алу жағдайын, кедергісіз ортаны қалыптастыру және әлеуметтік жәрдемақыларды әділ тағайындау мәселелерін талқылауды жоспарлап отыр.
Митинг 3 желтоқсан – Халықаралық мүгедектігі бар адамдар күніне орайластырылған.