Қолданыстағы Азаматтық кодекс 30 жылдан астам уақыт бұрын қабылданған. Енді заңнаманы заман талабына бейімдеп, азаматтардың құқықтарын қорғауды күшейту көзделіп отыр. Үкімет отырысында әділет министрі Ерлан Сәрсембаев қандай өзгерістер енгізілетінін түсіндірді, деп хабарлайды Ulysmedia.kz.
Мән-жай
Министрдің айтуынша, қолданыстағы құқықтық нормалардан толық бас тарту жоспарда жоқ. Өз тиімділігін дәлелдеген ережелер сақталады. Негізгі мақсат – заңнаманы жаңа Конституция мен экономикадағы өзгерістерге сай жаңарту.
– Жеке құқықтың тиімділігін дәлелдеген институттарын сақтай отырып, жаңа экономикалық қатынастарға қатысушылар үшін түсінікті әрі нақты ережелерді жетілдіру, олардың құқықтарын қорғау және тәуекелдерді бөлу тетіктерін қамтамасыз ету ұсынылады. Жаңа Конституция меншіктің барлық нысанын бірдей қорғауға кепілдік береді. Осы қағиданы дамыту үшін меншік иелерінің кепілдіктерін күшейту, адал сатып алушылардың құқықтарын қорғау және шарттық міндеттемелердің сенімді орындалуын қамтамасыз ету ұсынылады. Бұл азаматтардың мүлкін сақтауға, сондай-ақ кәсіпкерлік пен инвестиция үшін болжамды жағдай жасауға мүмкіндік береді, – деді Сәрсембаев.
Жаңа кодекс жобасын әзірлемес бұрын Әділет министрлігі қолданыстағы заңдар мен сот тәжірибесін зерделемек. Бұл жұмысқа Құрылтай депутаттары, ғалымдар, бизнес өкілдері мен сарапшылар тартылады.
Контекст
28 қазанда Қазақстан халқына Жолдауында Қасым-Жомарт Тоқаев жаңа Азаматтық кодекс қабылдауды ұсынды. Президенттің айтуынша, қолданыстағы құжат өтпелі кезең экономикасына арналып әзірленген және қазіргі заманның барлық талабына сай келмейді.
Жаңа кодекс 2027 жылдың соңына дейін қабылдануға тиіс.