Вэнс Трамп партиясының сайлауда жеңілуіне Иранмен соғыс себеп болғанын айтты

Reuters

АҚШ вице-президенті Джей Ди Вэнс Дональд Трамптың Иранға соққы беру туралы шешімін қолдар ма еді деген сұраққа нақты жауап бермеді. Бұған дейін ол Республикалық партияның Конгресс сайлауында жеңілуіне Иранмен соғыс себеп болғанын мәлімдеген еді. Президентпен кей мәселеде келіспесе де, Вэнс өзінің басты міндеті Трампты қолдау екенін айтты, деп хабарлайды Ulysmedia.kz.

Reuters агенттігінің жазуынша, Ақ үйде өткен бірлескен баспасөз мәслихатында журналистер Дональд Трамп пен Джей Ди Вэнске ақпанда басталған Иранға қарсы әскери операция туралы сұрақтар қойған.

Журналистер вице-президенттен шешім қабылдау өз қолында болса, Иранға соққы беруге бұйрық берер ме едіңіз деп сұраған. Алайда Вэнс тікелей жауап бермеген.

«Бұл шешімді президент қабылдады. Ал менің міндетім – АҚШ президентін қолдау», – деді ол.

Бұған дейін Трамп орынбасарынан нақтырақ жауап күтетінін аңғартқан. Атап айтқанда, Вэнстің Иранға соққы беру қажет болғанын мойындап, осындай жағдай қайталанса, дәл сол шешімді қолдайтынын айтқанын қалаған.

Вэнс сайлаудағы жеңіліске соғысты кінәлады

АҚШ Конгресіне өткен аралық сайлаудан кейін Вэнс Республикалық партияның нәтижесіне қатысты пікір білдірді.

Оның ойынша, республикашылдардың сайлаушылар қолдауынан айырылуына Иранмен соғыс басты себеп болған.

«Жеңілуіміздің себебі – соғыс. Мұны кеше кешке президенттің өзі де айтты. Егер бұл соғыс соған тұрарлық болды, Сенаттағы басымдықтан алты жылға айырылу ақталған шешім деп есептесеңіздер, оны дәлелдеп көріңіздер», – деп жазды Вэнс әлеуметтік желіде.

Вице-президент АҚШ-ты Иранмен соғысты тоқтатуға да шақырған.

Оның бұл мәлімдемесі Трамп екеуінің арасында келіспеушілік бар ма деген сауал туғызды. Әсіресе Вэнстің 2028 жылғы президент сайлауына ықтимал үміткер ретінде қарастырылып жүргені бұл пікірталасты күшейтті.

Трамп не деді?

АҚШ президенті Вэнстің өз пікірін ашық айтуына қарсы емес екенін, алайда оның ұстанымын толық қолдамайтынын жеткізді.

«Менің қол астымда жұмыс істейтін адамдардың өз пікірі болуға құқығы бар. Бірақ бір нәрсені айтайын: мен ирандықтарды жақсы білемін. Шынымды айтсам, олар есінен адасқан», – деді Трамп.

Кейін журналистер Вэнстен Иранмен соғыс республикашылдарға сайлауда айтарлықтай шығын әкелсе, мұндай шешімді ақтауға бола ма деп қайта сұраған.

Алайда вице-президент бұл жолы да нақты жауап бермеді.

Ол Иранның ядролық қаруға ие болуына АҚШ жол бермеуі керек екенін айтты. Вэнстің пікірінше, мұндай қарудың Иран қолына түсуі халықаралық қауіпсіздікке қатер төндіреді.

«Менің ойымша, мұндай шешімдерді президент қабылдайды. Президент осындай жағдай қайталанса, дәл солай әрекет ететінін айтты. Ал менің ұстанымым өзгермейді: менің мақсатым да, міндетім де – АҚШ президентін қолдау», – деді Вэнс.

Иранмен келіссөздер тоқтатылды

Бұған дейін Джей Ди Вэнс Иранмен соғысты жалғастыруға қарсы шығып, Тегеранмен дипломатиялық келіссөздерге қатысқан.

Жазда оның араласуымен тараптар уақытша атысты тоқтатуға келіскен. Алайда көп ұзамай бұл келісім бұзылған.

Кейінгі апталарда Вэнс келіссөздерді қайта бастауға тырысып, Иран басшылығының өкілдеріне жеке хаттар жолдаған.

Алайда Вэнс республикашылдардың сайлаудағы жеңілісін соғыспен байланыстырғаннан кейін Трамп Иранмен дипломатиялық байланыстарды тоқтатуды тапсырған.

«Бізге Иранмен ешқандай келісім қажет емес. Ол уақыт әлдеқашан өтті», – деп жазды АҚШ президенті.

Осыдан кейін Джей Ди Вэнске АҚШ-тың ішкі саяси мәселелеріне назар аудару тапсырылған.

Сізге қызық болуы мүмкін