Сердар Бердымұхамедов 8 наурыз - Халықаралық әйелдер күніне орай түркімен әйелдеріне 60 манаттан тарату туралы үкімге қол қойды, деп хабарлайды Ulysmedia.kz "Туркменистан сегодня" басылымына сілтеме жасап.
Президент 24 ақпанда қол қойған құжатта ақшалай сыйлық 1-6 наурыз аралығында салтанатты түрде тапсырылатыны айтылған.
Ресми бағам бойынша 60 манат – шамамен 17 доллар, қара базардағы бағаммен шамамен 3 доллар.
Президент тағайындаған ақшалай сыйлық кәсіпорындарда, мекемелер мен ұйымдарда жұмыс істейтін, сонымен бірге зейнетақы мен мемлекеттің жәрдемақысын алатын, бұған қоса аспирантура, докторантура және клиникалық ординатурада оқитын әйелдер, студенттер мен оқушы қыздар, мектепке дейінші мекемелерде оқитындар алады.
Үйде отырған әйелдер, мектепте оқымайтын қыздар, балабақшаға бармайтындар, жекеменшік кәсіпорындарда істейтін әйелдер президент сыйлығын алмайды. Олар бұған дейінгі жылдары да мұндай сыйлықтан құр қалған.
Түркіменстанда президент сыйлығы әйелдерге жыл сайын табыс етіліп жүр. Сыйлықтарды тапсыру салтанатын мемлекеттік телеарналар көрсетеді.
Мұндай дәстүр алғашқы президент Сапармұрад Ниязов кезінде басталған. Ол әйелдер мерекесін Наурызға ауыстырған. Гүрбанғұлы Бердымұхамедов билікке келген соң 2008 жылы 8 наурыз - Халықаралық әйелдер мерекесі қайтадан тойлана бастады.