БҰҰ миссиясы Бакудегі әлемдік ұйым үйлестірушісінің демеушілігімен Таулы Қарабаққа келді, деп хабарлайды Ulysmedia.kz.
Сапар миссия мүшелеріне Әзербайжанның аймақтағы қазіргі гуманитарлық қызметімен танысуға мүмкіндік береді. Сонымен қатар, олар инфрақұрылымды қалпына келтіру, тәркіленген қару-жарақ пен оқ-дәрілерді жою процестеріне куә болады.
Әзербайжандық БАҚ-тың хабарлауынша, миссия құрамында БҰҰ-ның әртүрлі агенттіктерінің өкілдері бар. Мұндай миссия соңғы рет шамамен 30 жыл бұрын Қарабаққа барғанын ескерсек, БҰҰ миссиясының бұл сапары маңызды оқиға болып саналады.
Естеріңізге сала кетейік, Әзербайжан әскерінің Таулы Қарабақтағы әскери операциясы бір тәуліктен сәл астам уақытқа созылды. Армения билігі сәрсенбіде 32 адам қаза тауып, 200-ден астам адам жараланғанын хабарлады. Түнде мыңдаған адам майданға жақын елді мекендерден көшірілді. Бұған қоса, Ресей Қорғаныс министрлігінің мәліметінше, ұрыс аймағында ресейлік бітімгершілік күштері қаза тапқан. Әскери қызметкерлер мінген көлік Жаңатақ ауылы маңындағы бақылау бекетінен қайтып келе жатқанда оқ атылды.
Әзербайжанның әрекеті Арменияның өзінде көптеген наразылық тудырды. Мыңдаған адам ел басшылығын танылмаған республика аумағында тұратын армяндарды қорғауға және араласуға шақыру үшін шерулерге шықты.