Қарағанды қаласында екі жеңіл көлік соқтығысып, соның салдарынан бір жасар сәби тіл тартпай кетті, деп хабарлайды ulysmedia.kz.
Полиция департаментінің мәліметінше, көліктердің бірін полиция қызметкері тізгіндеген.
Қайғылы оқиға 19 қазан күні сағат 21:45-те Қарағанды қаласында Республика даңғылы мен Дүйсембеков көшесінің қиылысында болды.
«Mercedes» автокөлігінің жүргізушісі – 37 жастағы полиция қызметкері жұмысынан үйіне қайтып бара жатып, бағдаршамның сары түсіне өтіп кеткен. Салдарынан 29 жастағы азаматтың басқаруындағы «ВАЗ-2114» автокөлігімен соқтығысқан. «Жол-көлік оқиғасы салдарынан «ВАЗ-2114» автокөлігінде болған 1 жастағы сәби қаза болды. Жүргізуші және 27 жастағы жолаушы әртүрлі жарақаттармен ауруханаға жеткізілді. Аталған факті бойынша Қазақстан Республикасы Қылмыстық кодексінің 345-бабы 3-бөлігіне сәйкес қылмыстық іс қозғалды. «Mercedes» автокөлігінің 37 жастағы жүргізушісі уақытша ұстау изоляторына қамалды», - делінген баспасөз хабарламасында.