Қазір республикалық бюджетке аударылып жатқан салықтың бірнеше түрін 2023 жылдан бастап жергілікті бюджеттерге аудару жоспарланып отыр. Бұл туралы Ұлттық экономика министрлігі хабарлады, деп жазады LS.
Аталған мәселені ведомство Қасым-Жомарт Тоқаевтың бюджетаралық қатынастарды реформалау және өңірлердің дербестігін нығайту туралы тапсырмасынан кейін қолға алған.
"Жергілікті бюджеттердің кірістерін ұлғайту мақсатында 2023 жылдан бастап салық түсімдерінің мынадай түрлерін беру ұсынылады: жануарлар дүниесін пайдаланғаны үшін төлемақы, республикалық маңызы бар ерекше қорғалатын табиғи аумақтарды пайдаланғаны үшін төлемақы, Қазақстан аумағында автокөлік құралдарының жүріп өткені үшін алым, республикалық бюджетке аударылатын мемлекеттік баждар", – деп түсіндірді министрлік өкілдері.
Ведомстводағылар бұл тізім әлі де толыға түсуі мүмкін екенін атап өтті.
Естеріңізге сала кетейік, 11 қаңтарда Мемлекет басшысы Қасым-Жомарт Тоқаев аймақтарды қолдау деңгейі көбіне тұрғындардың нақты қажеттіліктеріне емес, нақты әкімнің "салмағына" байланысты екенін атап өткен. Президенттің сөзінше, бұл өз кезегінде өңірлер дамуындағы теңгерімсіздік пен тұрғындардың наразылығына әкеліп соғады.