Бейсенбі күні жалпы отырыс барысында сенат «Қазақстан Республикасының Үкіметі мен Америка Құрама Штаттарының Үкіметі арасындағы халықаралық салық тәртібін жетілдіру туралы келісімді ратификациялау туралы» заңды қабылдады.
Ұлттық экономика вице-министрі Тимур Жақсылықов сенаторларға құжатты ұсына отырып, заң жобасы қаржы ұйымдарының, оның ішінде кредиттік ұйымдардың, сақтандыру, брокерлік және басқа да ұқсас компаниялардың қызметіне қатысты екенін хабарлады.
«Заңға сәйкес, АҚШ-тың қаржы ұйымдарымен халықаралық іскерлік операциялары бар барлық шетелдік қаржы ұйымдары АҚШ салық төлеушілерінің шоттары туралы ақпарат беруге міндетті. Осы режимге қосылмаған жағдайда, егер төлемді алушы АҚШ-та салық салынатын тұлға болып табылса, ал аударылған қаражат АҚШ аумағындағы инвестициялармен байланысты табыс болса, халықаралық банк аударымдарынан аударым сомасынан 30% ұсталуы мүмкін. Келісімге қосылған қаржы институттары Қазақстанда шот ашқан барлық америкалық жеке және заңды тұлғалар туралы ақпаратты анықтауға және ашуға міндетті болады», - деді ол.
Қазақстанның келісімге қосылуы АҚШ-та шот ашқан барлық қазақстандық жеке және заңды тұлғалар туралы ақпарат алуға мүмкіндік береді.
Жақсылықов «аталған мәселе бойынша елдер арасындағы өзара іс-қимыл Қазақстан бюджетіне де оң әсерін тигізетінін атап өтті.
«Келісімге сәйкес, Қазақстан орталықтандырылған ақпарат жинауды көздейтін модельді неғұрлым оңтайлы етіп таңдады, өйткені осы модельді іске асыру: қаржы жүйесін бақылауды сақтауға; Қазақстанның азаматтары мен резиденттері туралы ққсас ақпаратты АҚШ-тан алуға; қаржы институттарының әкімшілік шығындарын қысқартуға; қаржы секторы үшін тәуекелдерді азайтуға мүмкіндік береді», - деп толықтырды Жақсылықов.