Астанада Бельгия королі Филипп пен патшайым Матильданың ресми қарсы алу рәсімі өтті. Корольдік жұп Қазақстанға үш күндік мемлекеттік сапармен келді. Қонақтарды Ақордада салтанатты түрде қарсы алды, деп хабарлайды Ulysmedia.kz.
Ақорда үстінен тікұшақтар ұшты
12 қазанда Президент резиденциясының алдында әскери тікұшақтар тобы Қазақстан мен Бельгияның мемлекеттік туларын іліп, демонстрациялық ұшу жасады.
Қасым-Жомарт Тоқаев пен король Филипп бір-біріне ресми делегация мүшелерін таныстырды. Бұдан кейін президенттік оркестрдің орындауында екі елдің мемлекеттік әнұрандары шырқалды. Салтанатты рәсімге құрмет қарауылы да қатысты.
Король мен патшайым Қазақстанға 11 қазанда ұшып келді. Әуежайда Тоқаев Бельгия монархымен аз-кем әңгімелесіп үлгерді. Президент Қазақстан экономикасының дамуы туралы айтып, бұл сапар екі ел арасындағы қарым-қатынасты нығайтады деген үмітін білдірді. Филипп король қонақжайлық танытқаны үшін алғыс айтты.
– Біз осында келгенімізге өте қуаныштымыз… және сіздердің елдеріңізбен барынша жақынырақ танысамыз деп үміттенеміз, – деді монарх кеше.
Сапар бағдарламасы
Бұл – Бельгия монархының Орталық Азияға тарихтағы алғашқы мемлекеттік сапары. Корольдік жұппен бірге Қазақстанға министрлер, кәсіпкерлер және университет өкілдері кіретін үлкен делегация келді.
Сапар аясында Астана мен Алматыда кездесулер жоспарланған. Тараптар сауда, логистика, ауыл шаруашылығы және Орта дәлізді дамыту мәселелерін талқылайды.
Сондай-ақ Қазақстан-Бельгия іскерлік кеңесінің отырысы өтіп, компаниялар мен университеттер арасында бірқатар келісімге қол қою көзделген.
Король Филипп Қазақстанға бұған дейін де келген. Таққа отырғанға дейін ол елімізге үш рет – 2002, 2009 және 2010 жылдары сапарлаған. Кейінгі сапарында болашақ король Бельгияның экономикалық делегациясын бастап келген.