2021 жылғы 16 қарашада Ақмола облысының Шортанды кенті Линейная көшесінде газ баллоны жарылды. Бұл туралы ҚР Төтенше жағдайлар министрлігінің ресми өкілі Талғат Уәли мәлімдеді деп хабарлайды Ulysmedia.kz.
«Сағат 21:38-де Шортанды кентінің №18 байланыс пунктіне полиция бөлімінің кезекшісінен газ баллонның жарылғандығы туралы хабарлама келіп түсті. Өртті сөндіруге ТЖД 35 қызметкері мен 7 техникасы, «Жер Ана» ЖШС 4 қызметкері мен 1 техникасы жұмылдырылды», – деді ол.
Барақ үлгісіндегі пәтерде өрт шығып, шатырын толықтай жалын шарпыған. Аумағы шамамен 350 шаршы метрді құраған өрт сағат 22-35-те ауыздықталып, сағат 23:55-те толық сөндірілген.
«Оқиға орнынан 3 адамның мәйіті табылды. Тағы он адам түрлі дене жарақаттармен аудандық орталық ауруханаға жеткізілді.
Оқиғаның мән-жайы мен себептерін анықтау үшін Ақмола облыстық тергеу-жедел тобы және зерттеу-өрт зертханасы жұмыс істеуде», – деді министрлік өкілі.
Қазақстан Төтенше жағдайлар министрлігі азаматтарға тұрмыстық газ баллонын қолдануда өрт қауіпсіздігі талаптарын қатаң сақтауға шақырады.