Ақмола облысының әкімі Марат Ахметжанов 21 қыркүйекте бірден екі басшыны – Степногорск қаласының әкімі Гайдар Қасенов пен Аршалы ауданының әкімі Достанбек Есжановты қызметінен босатты. Кадрлық шешімдердің ресми себептері әзірше айтылған жоқ. Екі шенеунік те өз аумақтарына 2024 жылдың соңында әкім болып тағайындалған, деп хабарлайды Ulysmedia.kz.
Мән-жай
Гайдар Қасенов 2024 жылғы қарашада Степногорск әкімі болып тағайындалса, Есжанов сол жылдың желтоқсанында Аршалы ауданын басқарды.
Гайдар Қасеновтің Степногорскідегі қызметі кезінде оған кемінде екі рет тәртіптік шара қолданылған.
2025 жылғы сәуірде қала абаттандырылуына қатысты жергілікті атқарушы органдардың жұмысына тиісті бақылау жасамағаны үшін оған сөгіс жарияланған.
2026 жылғы қаңтарда прокуратура жылу ақысының есептелуіне қатысты заңбұзушылықтарды анықтады. 41 көпқабатты үйде төлемдер есептеу құралдарының нақты көрсеткіштері бойынша емес, белгіленген нормативтер негізінде жүргізілген. Соның салдарынан 8 мыңнан астам тұрғынға жалпы сомасы 8,1 млн теңгеге қайта есептеу жасалды.
Прокуратура сонымен қатар жергілікті атқарушы органның жылыту маусымына дайындықты тиісті деңгейде бақыламағанын атап өтті. Тексеруден кейін Степногорск әкімі тәртіптік жауапкершілікке тартылды.
Тағы бір мәселе мемлекеттік сатып алуларға қатысты. 2026 жылғы маусымда Степногорскіде қаланы қысқы және жазғы күтіп-ұстауға арналған жалпы сомасы 1,1 млрд теңге болатын тоғыз мемлекеттік сатып алу тоқтатылды.
Прокуратура мәліметінше, шығындарды жоспарлау және құжаттарды әзірлеу кезінде заңбұзушылықтарға жол берілген. Сметаларға жұмыс көлемі артық көрсетілген және экономикалық тұрғыдан негізделмеген шығындар енгізілген.
Алайда бұл сатып алуларға қатысты мәселе тікелей Степногорск әкімінің орынбасарына қойылған. Сондықтан аталған сатып алулардың Қасеновтің қызметтен босатылуына себеп болғанын дәлелдейтін нақты дерек жоқ.
Ал Аршалы ауданында не болды?
Достанбек Есжановқа қатысты оның өзіне тікелей байланысты тәртіптік жаза немесе қылмыстық іс туралы ашық ақпарат табылған жоқ.
Дегенмен аудандағы мәселелер облыс билігі деңгейінде талқыланған. 2026 жылғы қаңтарда негізгі проблемалардың қатарында инфрақұрылымдық жобалардың, соның ішінде су құбырлары, электр желілері мен жол құрылысының кешігуі аталды.
Кешігудің себептері ретінде жер учаскелерін уақытында рәсімдемеу және жұмыстардың сапасыз орындалуы көрсетілген.
Есжанов 2024 жылғы желтоқсанда қызметке тағайындалған кезде облыс әкімі оған жылыту маусымын тұрақты өткізу, электр және сумен жабдықтау мәселелерін шешу, сондай-ақ жол желісін дамыту жұмыстарын жандандыруды тапсырған.
Сонымен бірге 2026 жылғы маусымда Есжановтың өзі аудандағы инфрақұрылымдық жобалардың жүзеге асырылуы туралы есеп берген. Олардың қатарында сумен жабдықтау жүйесін жаңғырту, жолдарды жөндеу, автобус қатынасын дамыту және тұрғын үй құрылысы бар.
Ақмола облысының әкімдігі жаңа әкімдердің тағайындалатыны туралы әзірше хабарлаған жоқ.