Бейнеу ауданы Қызыләскер ауылынан 8 шақырым жерде қоқиқаздардың өлексесі табылды, деп хабарлайды Ulysmedia.kz.
Бейнеу ауданына қарасты Сам құмында Қазақстанның Қызыл кітабына енген әзірге 5 бас қоқиқаздың (фламинго) өлген денелері құм арасында жатқанын бүгін сол аумақта мал жайып жүрген 7-сынып оқушысы Ғизат Орынбай көріп, видеоға түсіріп алған. Видеоны Маңғыстау аймақтық экологиялық кеңес таратты.
Бір қызығы, дәл осындай жағдай тура бір жыл бұрын, 2022 жылдың 24 сәуір күні болған. Ол кезде мамандар құстардың өліміне аймақтағы қолайсыз ауа райы себеп болуы мүмкін деген пікір айтқан еді.
“Соңғы кездері Маңғыстау облысының аумағында шаңды дауыл соғып, күн желді болып тұрды. Бұл құстардың миграциясы Бейнеу ауданы аумағынан өтеді. Әзірге қолайсыз ауа райынан, құстардың миграциясы кезінде ішіндегі әлсіздері орта жолда қонып, әрі қарай солтүстік бағытқа ұша алмай, олардың өліміне әкелген болуы мүмкін деп болжауға болады. Себебі шөлейт бұл аумақта су көздері жоқ. Ендігі жерде ветеринарлық қызмет тарапынан тиісті сынамалар алынады деп күтеміз”, – делінген хабарламада.
Қызғылт қоқиқаздар – жыл құстары. Жазда олар Ақмола облысындағы Қорғалжын қорық аймағын мекен етеді. Ал қыста Ирак немесе Түркіменстанның жылы аймақтарына көшеді. Көктемде және күзде олар Маңғыстау облысында тынығу үшін тоқтайды.
Қызғылт қоқиқаз Қазақстанда Қызыл кітапқа енгізілген.