Нұрлан Жақыпов Су спорты түрлері федерациясының президенті қызметінде қала береді

Ulysmedia/ЖИ

«Самұрық-Қазына» қорының басқарма төрағасы, Су спорты түрлері федерациясының президенті Нұрлан Жақыпов әзірше қызметінен кетпейді. Бұл туралы Туризм және спорт министрі Ербол Мырзабосынов мәлімдеді, деп хабарлайды Ulysmedia.kz.

Толығырақ

БАҚ өкілдері министрден федерация президенті қамауға алынғаннан кейін ұйымды кім басқаратынын сұрады.

Мырзабосынов әзірше кадрлық өзгерістер жоспарланбағанын айтты.

– Ол федерация президенті болып қала береді. Тергеу жұмыстары аяқталған соң шешім қабылдаймыз, – деді министр.

Журналистер министрден Жақыповтың қамауға алынуы қазақстандық спортты қаржыландыруға әсер етуі мүмкін бе деп те сұрады. Атап айтқанда, «Самұрық-Қазына» қоры кәсіби спорт клубтарына бұрынғыдай қаражат бөле бере ме деген сауал қойылды.

Мырзабосынов қаржыландыру қалыпты тәртіппен жалғасып жатқанын жеткізді.

Контекст

Еске салайық, 11 қарашада ҰҚК қызметкерлері «Самұрық-Қазына» қорының басқарма төрағасы Нұрлан Жақыпов пен «Қазақстан темір жолы» басшысы Елжас Отыншиевті сыбайлас жемқорлық қылмысын жасады деген күдікпен ұстады. 14 қарашада сот оларды қамауға алуға санкция берді.

Қазақстан президенті Қасым-Жомарт Тоқаев бұл ұсталымдарды елдегі сыбайлас жемқорлықтың ауқымын көрсететін белгі деп атады.

Ал премьер-министр Олжас Бектенов жекелеген лауазымды тұлғаларға қатысты тергеу әрекеттеріне қарамастан, «Самұрық-Қазына» тобына кіретін компаниялар штаттық режимде жұмыс істеп жатқанын мәлімдеді.

Сізге қызық болуы мүмкін