Белградта (Сербия) өтіп жатқан бокстан әлем чемпионатында Қазақстан құрамасы өкіліне қатысты жанжал шықты, деп хабарлайды ulysmedia.kz.
48 келіге дейінгі салмақ дәрежесінде 1/8 финалда Теміртас Жүсіповтің сербиялық Омер Аметовичке қарсы жекпе-жегі наразылық тудырды. Жекпе-жекте төрешілер шешімімен қазақстандық жеңіске жетті, дейді vesti.kz.
Сербияның бокс одағы бұл шешімді «ұят» деп атап, төрешілерді «жеңісті ұрлады» деп айыптады.
«Төрешілер шешімі біздің боксшымызға қарсы болды», - деді одақ президенті Слободан Джурич.
«Серб боксшыларының бірінші, үшінші және төртінші жекпе-жектерінде осындай болды. Төрешілер бәрінің көзінше қарсыластарына алғашқы раундты берді. Дегенмен бұл раундтар боксшыларымыздың таза жеңісі еді», - деді ол.
Функционер жекпе-жек нәтижелеріне шағымданғанын айтты.
Жүсіпов бокстан әлем чемпионатының ширек финалына шыққан. Келесі жекпе-жекте жеңіске жетсе, қазақстандық әлем чемпионаты жүлдесіне ілігеді.
Бұған дейін де өзге қазақ боксшысы Олимпиада чемпионын жеңіп, Өзбекстан тарапы даулы мәлімдеме жасаған болатын.