Қазақстанда бөлшек және көтерме сауда көлемі өскен, деп хабарлайды Ulysmedia.kz.
ҚАНША ПАЙЫЗҒА ӨСКЕН
Бұл туралы ҚР Ұлттық статистика бюросы хабарлады. 2024 жылғы қаңтар-тамыздың қорытындысы бойынша бөлшек сауда көлемі 12 731,9 млрд теңгеге жетті, бұл өткен жылдың сәйкес кезеңімен салыстырғанда 6,8%-ға артық.
ЖЕКЕ КӘСІПКЕР МЕН БАЗАРЛАР
Деректерге сәйкес сауда кәсіпорындарында (6,9%-ға), сондай-ақ жеке кәсіпкерлерде, оның ішінде базарларда жұмыс істейтіндерде (6,5%-ға) өсім байқалады.
31,9% АЗЫҚ-ТҮЛІКТІҢ ҮЛЕСІНДЕ
2024 жылдың 1 қыркүйегіне бөлшек саудадағы тауар қорларының көлемі 1 543,8 млрд теңгені құрады. Бөлшек сауданың жалпы көлеміндегі азық-түлік тауарларының үлесі 31,9% құрады, ал азық-түлік емес тауарлар 68,1% құрады. Бұл ретте азық-түлік тауарларын өткізу көлемі өткен жылдың сәйкес кезеңімен салыстырғанда 8,7%-ға, ал азық-түлік емес тауарларды өткізу көлемі 5,9%-ға ұлғайды.
КӨТЕРМЕ САУДА
Көтерме сауда 4,7%-ға өсіп, 2024 жылғы қаңтар-тамызда 26 403,3 млрд теңгені құрады. Көтерме сауда айналымының құрамында азық-түлік емес тауарлар мен өндірістік-техникалық мақсаттағы өнімдер басым, олардың үлесі 80,2% құрайды.
СЫРТҚЫ САУДА
Сыртқы саудада жағдай басқаша. 2024 жылғы қаңтар – шілдеде Қазақстанның сыртқы сауда айналымы 79 млрд АҚШ долларын құрады, бұл 2023 жылғы кезеңмен салыстырғанда 1,8%-ға аз. Бұл ретте экспорт 2,2%-ға өсіп, 46,1 млрд АҚШ долларына жетті, ал импорт 6,9%-ға төмендеп, 32,8 млрд АҚШ долларын құрады.
ЕАЭО елдерімен сауда да төмендегенін көрсетті. Экспорт 15,9%-ға қысқарып, 5 737,6 миллион АҚШ долларын құрады, ал импорт өткен жылдың сәйкес кезеңімен салыстырғанда 4%-ға, 10 061,4 миллион АҚШ долларына дейін төмендеді.