Ресейде тағы мобилизация жарияланса Қазақстан билігі қалай әрекет етеді? Қазақстан билігі бері өткен ресейліктерді депортациялай ма? Ulysmedia.kz порталының бұл сұрағына Еңбек және халықты әлеуметтік қорғау вице-министрі Асқарбек Ертаев жауап берді.
АРНАЙЫ АЛГОРИТМ БАР
– Еуразиялық экономикалық одаққа мүше болғаннан кейін бізде келісімшарт бар. Одаққа мүше елдердің азаматтары 90 күн бойы Қазақстанда бола алады. Көбі Астана мен Алматы сияқты ірі қалаларға барады. 90 күннен кейін Қазақстан тарапының шақыруымен жұмыс орналасып, жұмыс істей де алады, – дейді Ертаев.
Егер Ресейде тағы мобилизация жарияланып, ресейліктердің саны көбейіп жатса, Қазақстан билігінің ол мәселеге байланысты нақты ережесі бар. Кез келген мемлекеттен көп адам бір уақытта көшіп жатса, оларды қабылдайтын арнайы алгоритммен бекітілген. Ол қағида 2023 жылы Үкімет қаулысымен қабылданған.
ЕГЕР 1 МЛН АДАМ КЕЛСЕ…
– Егер бір елден бір миллион адам келем десе, онда нақты жазылған: ол кезде Еңбек министрлігі ғана жұмыс істемейді. Бәрі қосылады. Шекара қызметі оларды қабылдап, тіркеп, белгіленген жерге орналастырамыз. Сондай жағдай болса, жұмыс тобы құрылады. Оларды нақты қай жерге орналастыру керектігі шешіледі. Орын белгіленеді. Оларға бірден неге келгені, нендей себеппен жеткені жөнінде тексеру жұмыстары жүргізіледі. Транзитпен Қазақстаннан кетуі мүмкін.
Орналасқан жерден ары қарай барлық министрліктер жергілікті атқарушы органдармен жұмыс істейді. “Қазақстанда қалам” деген азаматтар болса, мамандықтары сұраныстары сай келсе, біз оларды жұмысқа тартамыз. Егер олар транзитпен кетеміз десе, шығарып салады. Осындай алгоритмен жұмыс істеледі, – дейді Ертаев.
2022 ЖЫЛҒЫ КӨШ
Қазақстанның Еңбек және халықты әлеуметтік қорғау министрлігінің мәліметінше, 2022 жылы Ресей билігі Украиндағы соғысқа байланысты мобилизация жариялаған тұста Қазақстанға 837 мың ресейлік кірген, олардың 780 мыңы Қазақстаннан шығып кеткен. Бұл туралы сол жылы желтоқсанда Астанада өткен брифингте министрлікке қарайтын миграция комитетінің басшысы Ілияс Испанов мәлімдеген еді. Испановтың сөзінше, қазір Қазақстанда 298 мың ресейлік бар, оның ішінде 30 мыңы елде жұмыс істеуге қалған. Бұған қоса, министрліктің мәліметінше, Қазақстанда 20 мың ресейлік студент оқиды.