Жаздың басында Дүниежүзілік жабайы табиғат қорының қолдауымен Қазақстан Орман шаруашылығы және жануарлар дүниесі комитеті мен Нидерландының Святой Льва орталығы арасында Меморандум жасалған. Оған сай, елге 2 жолбарыс ақысыз негізде берілді, деп хабарлайды Ulysmedia.kz.
БОГДАН МЕН КУМА
Қазақстанда араға 70 жылдан астам уақыттан кейін жолбарыстардың ұрпақтары жабайы табиғатқа жіберілгелі отыр. Бұл туралы экология және табиғи ресурстар министргі мәлім етті.
– Жылдар бойы Дүниежүзілік жабайы табиғат қоры (WWF) пен Қазақстан арасындағы тығыз ынтымақтастықтың арқасында екі амур жолбарысы «Іле-Балқаш» мемлекеттік табиғи резерватына Нидерландтағы «Святого льва» жабайы жануарларды сақтау орталығынан (Stichting Leeuw) жеткізілді. Бұл оқиға экожүйені қалпына келтіру және жоғалған биоәртүрлілікті қайтару жолындағы маңызды қадам болды. Бағдарламаны экология және табиғи ресурстар министрлігінің Орман шаруашылығы және жануарлар әлемі комитеті WWF және БҰҰДБ-ның қолдауымен жүзеге асыруда. Богдана мен Кума «Іле-Балқаш» резерватындағы WWF-тың арнайы құрылған вольерлік орталығында өмір сүріп, кейін олардың ұрпағын табиғатқа жіберу жоспарлануда.
ТАРИХИ ОҚИҒА
Осы демалыс күндері жолбарыстар тұрақты күзетшілердің бақылауымен жаңа үйіне жүк ұшағы мен тік ұшақ арқылы арнайы транспорттық контейнерлерде жеткізілді. Қазіргі уақытта олар «Іле-Балқаш» резерватының қорықтық аймағының шекарасында орналасқан кіші вольерде акклиматизациядан өтуде. Бірнеше аптадан кейін оларды кеңірек вольерлерге шығарады.
“Бұл атаулы және тарихи оқиға – Қазақстан үкіметінің WWF және БҰҰДБ қолдауымен Іле-Балқаш сағасы экожүйесін қайта қалпына келтіру және өңірде жолбарыстарды жерсіндіру бойынша өршіл бағдарламасының бір бөлігі. Орталық Азияда бұл жыртқыштар 70 жылдан астам бұрын жойылып кетті және бүгінгі таңда бүкіл әлем осындай салтанатты оқиғаның куәгері болып отыр. Жолбарыстарды жерсіндіру олардың тарихи отанына қайта оралуына ғана емес, сонымен бірге тұрақты экожүйені қалпына келтіру үшін маңызды қадам болып саналады, бұл адамдарға ғана емес, елдің табиғатына да үлкен пайдасын тигізеді. Бұл жоба биоалуантүрлілікті сақтап қалу және экологиялық тепе-теңдікті қолдау үшін ғаламдық күш-жігер салуды білдіреді” – дейді WWF Еуропа және Солтүстік Африка елдері жөніндегі өңірлік директоры Аджай Барай.
Министрлік ауқымды жобаны іске асыру кезінде Қазақстан Республикасының Нидерландыдағы Елшілігі белсенді көмек көрсеткенін жеткізді.