Бұған дейні ішкі істер министрі Ерлан Тұрғымбаев Қазақстанда алдағы үш жылда 4 түзету мекемесі салынатынын мәлім еткен еді. Аталған министрліктің қылмыстық-атқаруы жүйесі төрағасының орынбасары Мейрам Аюбаев осы түрмелер қай өңірде салынатынын айтты, деп хабарлайды ulysmedia.kz.
«Бұл түзету мекемелері Түркістан, Ақтөбе, Алматы және Маңғыстау облыстарында салынады. Әр мекеме 1500 адамға арналады. Түзету мекемелері мемлекеттік-жекеменшік серіктестік шеңберінде салынады. Бұл жерде қаражаттың 70 пайызын инвестор салса, 30 пайызын мемлекет бөледі. Арнайы конкурс өткізеді. Кім ұтса, сол алады», - деді Мейрам Аюбаев Сенаттың кулуарында.
Оның айтуынша елдегі қазіргі түзету мекемелерінің бәрі де өткен ғасырдың 30-40 жылдары салынған. Ал Қазақстан тәуелсіздік алғалы елде бірде-бір түрме тұрғызылмаған.
«Төрт колонияның жобалау жұмыстары жүргізіліп жатыр. Біздің ойымызша, бұл – халықаралық стандарттардың бәріне жауап беретін түзету мекемелері болар деген үміттеміз. Ескі түрмелерде отырған сотталушылардың бәрі де сол жаңа түрмеге ауыстырылады», - деді ол.