Алматы қаласының Полиция департаментінің бастығы Арыстанғани Заппаров шаһардағы қылмыстық статистикаларды келтіріп, талдау жасады, деп хабарлайды Ulysmedia.kz.
СТАТИСТИКАЛЫҚ ДЕРЕКТЕР
Полиция департаментінің мәліметінше аса ауыр қылмыстардың саны 23%-ға өскен.
«Жалпы қылмыс санының азаюына қарамастан, біз аса ауыр қылмыстардың 23,7%-ға өскенін тіркеп отырмыз. Мысалы, биыл денсаулыққа ауыр зиян келтірудің 123 фактісі тіркелді, соның ішінде өлімге әкелген оқиғалар саны бір жарым есе артты», — деді Алматы қаласының Полиция департаментінің бастығы Арыстанғани Заппаров
СЕБЕПТЕРІ ҚАНДАЙ
Жыл басынан бері Алматыда 50 кісі өлтіру фактісі тіркелген, олардың басым бөлігі алкогольдік ішімдіктерді бірлесіп ішу кезінде немесе отбасылық жанжалдарда жасалған. Мұндай қылмыстардың тек үштен бірін ғана жергілікті тұрғындар жасайды. Сонымен қатар, балалар арасындағы құқық бұзушылықтар, суицидтер және кәмелетке толмағандарға қатысты қылмыстар саны артып келеді.
ЕСІРТКІ
Жыл басынан бері қалада есірткінің заңсыз айналымының 530 фактісі анықталды. 326 кг-нан астам есірткі тәркіленді, олардың 50 кг — синтетикалық есірткі. Сондай-ақ, есірткі заттарын сату үшін пайдаланылған 413 сайт бұғатталып, 14 нарколаборатория анықталды.
СУИЦИД
2023 жылмен салыстырғанда суицид саны 31 жағдайдан 50-ге, ал өз-өзіне қол жұмсауға әрекет жасау саны 24-тен 37-ге дейін өсті. Сонымен қатар, қалалық Полиция департаментінің Интерпол бөлімі шетелдік әріптестерімен бірге балаларға қауіпті төрт телеграм-каналды анықтап, бұғаттады.