Чехия премьер-министрі Петр Фиала Украинаға жарты миллионнан астам артиллериялық снаряд сатып алу мақсаты биыл орындалатынын, ал келесі жылы оқ-дәрі жеткізу жалғасатынын мәлімдеді, деп хабарлайды Ulysmedia.kz.
ЖОСПАРҒА САЙ ІСКЕ АСЫП ЖАТЫР
Петр Фиаланың сөзінше Чехияның Украинаға арналған артиллериялық снарядтарды сатып алу бастамасы кестеге сәйкес іске асырылуда, биылғы жылдың соңына дейін Киевке жарты миллионнан астам оқ-дәрі жеткізу мақсатына қол жеткізіледі, деп жазады ВВС.
1,6 МИЛЛИАРД БӨЛУІ МҮМКІН
Фиала келесі жылы да жеткізілімдердің үздіксіз жалғасуын күтетінін айтты, бірақ нақты мерзімдерді атамады. Қазіргі уақытта Еуропалық Одақ пен НАТО-ның 15 елі шамамен 1,6 миллиард еуро бөлуді уәде етіп, үшінші елдерден 800 мыңға дейін оқ-дәрі сатып алуды жоспарлап отыр. Басқа қатысушылар Чехия бастамасына әртүрлі жолдармен үлес қосуда, оның ішінде снарядтарды тасымалдауға көмек көрсетуде. Қарудың қайдан алынғаны туралы мәліметтер қатаң құпия.
Чехия премьер-министрі бұл снарядтарды сатып алу бастамасы Украинаға көрсетілетін қолдаудың тек бір бөлігі екенін баса айтты. Украина Ресейдің әскери шабуылына қарсы үш жылға жуық уақыттан бері қорғануда. Фиала қыс мезгілінің жақындауы және Ресейдің энергетикалық инфрақұрылымға жасаған ауқымды шабуылдарының салдарына алаңдаушылық білдірді. Сонымен қатар, ол Солтүстік Корея әскерлерінің Ресейдің басқыншылық соғысына қосылуы мүмкін екенін айыптап, мұндай қадамға жол берілмейтінін айтты.
«Бұл Солтүстік Корея немесе Иран сияқты режимдердің бүкіл әлемдегі бейбітшілікке, халықтардың бір-бірімен тату өмір сүруіне және халықаралық тәртіпке қандай қауіп төндіретінін көрсетеді», – деп атап өтті Чехия премьер-министрі.
НИДЕРЛАНДЫ ҮКІМЕТІНІҢ КӨМЕГІ
Бұған дейін Нидерланды үкіметі Киевке арналған артиллериялық снарядтарға 271 миллион еуродан астам қаражат бөлетінін хабарлады.
«Осылайша, біз Украинаға 2025 жылға дейін оқ-дәрі қорын қолдауға көмектесеміз және еуропалық қорғаныс өнеркәсібінің одан әрі өсуін ынталандырамыз», – деп жазды Нидерланд министрлер кабинетінің басшысы Дик Схоф X желісінде.
Ақпанда Чехия президенті Петр Павел Мюнхендегі қауіпсіздік конференциясында Украина үшін үшінші елдерден 500 мың 155 мм және 300 мың 122 мм снарядтар сатып алуды ұсынды. Алғашқы оқ-дәрі партиясы маусым айында Украинаға жеткізілді.