Астанада жол апаты тіркеліп, бір адам оқиға орнында жан тапсырды, деп хабарлайды Ulysmedia.kz.
Әуелі жол-көлік оқиғасының фото және видеокадрлары whatsapp желісіне тараған. Онда апаттан көз жұмған әйелдің денесі көрінеді. Жедел жәрдем қызметінің мамандары быт-шыт болған көліктен екінші адамды шығара алмай жатыр.
– Қатты тайғанақ, жігіттер, байқаңдар, – дейді оны көрген азаматтың бірі аудиодыбыс арқылы.
Астана қаласының полиция департаменті оқиғаның болғанын растады.
– Toyota көлігінің жүргізушісі Қошқарбаев жақтан Сарайшыққа апарар жолдағы М-1 көпірінде келе жатып, рөлге ие бола алмай, көпірдің қоршауына соғылған. Жол-көлік оқиғасы салдарынан жолаушы жан тапсырды, – делінген хабарламада.
Жүргізуші ауруханаға жеткізілген. Болған оқиғаның мән-жайы тексеріліп жатыр.