Алматыда 2025 жыл қарсаңында «Алматының 8 кереметі: отбасылық мереке – таңғажайып Жаңа жыл» атты ауқымды бағдарлама әзірленген. Қаланың барлық 8 ауданын қамтитын мерекелік іс-шаралар 31 желтоқсанға дейін жалғасады, деп хабарлайды Ulysmedia.kz қала әкімінің баспасөз қызметіне сілтеме жасап.
БҮГІН
Бүгін, 30 желтоқсан күні, Астана алаңында сағат 17:00-ден 18:30-ға дейін цирк артистерінің таңғажайып шоуы өтеді. Эквилибристер тамаша трюктерімен таңғалдырса, жонглерлер доптарды, ұршық пен сақиналарды шебер меңгергенін көрсетеді. Атлеттер өздерінің күш-қуаты мен төзімділігін танытса, сайқымазақ интерактивті ойындар мен қойылымдар арқылы көрермендерге қуаныш сыйлайды.
Бағдарламаның шарықтау шегі – фаер-шоу болады. Артистер отпен жасалатын ерекше трюктер көрсетіп, халықты таңқалдырмақ.
Одан кейін сағат 18:30-дан 20:00-ге дейін сахнада «Ұлытау» әйгілі этно-рок тобы және «Алатау» дәстүрлі өнер театрының артистері өнер көрсетеді. Олар көрермендерге әсерлі композициялар мен ұмытылмас көңіл-күй сыйлайды.
Сондай-ақ, 30 желтоқсанда сағат 18:30-дан 20:00-ге дейін Абай алаңында Мемлекеттік қуыршақ театрының артистері жарқын эмоциялар мен жаңа жылдық сиқырға толы мерекелік бағдарлама ұсынады. Кештің басты кейіпкерлері Аяз Ата, Ақшақар, көңілді қар адамдары және қонақтарды қызықты ойындарға, билерге және флешмобтарға тартатын қуыршақтар болады.
ЕРТЕҢ
31 желтоқсан күні Алматыда эстрада жұлдыздардың қатысуымен екі үлкен концерт өтеді.
Абай алаңында 19:00-ден 21:00-ге дейін Бүркіт, Ақбота-Нұр, Диана Исмаил, Кенжебек Жанәбілов және басқа да артистер өнер көрсетеді.
Астана алаңында концерт сағат 21:00-де басталып, 2025 жылдың 1 қаңтары сағат 01:00-де аяқталады. Түн жарымда отшашу болады. ҚБТУ алдындағы сахнада Ерсейіт Әлиев, Елбол Қуанбек, Ұлжан Ағлақова, Chingiz Typhoon, Makvin, Orynkhan, 6ellucci, Мархаба Сәби, Moldanazar және RaiM өнер көрсетеді.
Мерекелік іс-шараға дайындық жұмыстарына байланысты 31 желтоқсанда сағат 8:00-ден бастап Төле би көшесінің Назарбаев даңғылынан Абылай хан даңғылына дейінгі бөлігі толығымен жабылады. Жол қозғалысы 2025 жылдың 1 қаңтарында сағат 02:00-де қайта ашылады.