Алматы халықаралық әуежайы ауа райына байланысты күшейтілген режимде жұмыс істеп жатыр, деп хабарлайды Ulysmedia.kz.
ШЕКТЕУЛЕР
Алматы халықаралық әуежайы ауа райының нашарлауына байланысты әуежайдың өндірістік қызметтері күшейтілген режимде жұмыс істеп жатқанын хабарлады. Қардың қарқынды жаууына орай ұшақтарға мұздануға қарсы өңдеу қызметтерін көрсетуге шектеулер енгізілген.
Барлық қызмет рейстердің кешігуін азайту және операциялардың қалыпты тәртібін қалпына келтіру үшін қажетті шараларды қолдана отырып, күшейтілген режимде жұмыс істеп жатыр.
- Жолаушылардан рейстердің ағымдағы статусын ұшар алдында әуежай мен әуекомпаниялардың ресми сайттарынан тексеруді сұраймыз. Түсіністік танытқандарыңыз үшін алғыс айтамыз, дейді әуежай өкілдері.
АЯЗ
Еске салайық, бұған дейін синоптиктер алдағы күндері қақаған аяз түсетінін ескерткен болатын.
ӨҢІРЛЕР БОЙЫНША
Солтүстік өңірлерде түнде ауа температурасы 20-30 градус аяз, кей жерлерде 35 градусқа дейін қатты аяз болады, күндіз 13-20 градус аяз.
Орталық пен шығыста түнде 20-35 градус, ал кейбір аудандарда 40 градусқа дейін күшейіп, қатты аяз болады.
Оңтүстікте түнде 15-25 градус, кейбір жерлерде 28 градусқа дейін қатты аяз болады, күндіз температура 5-15 градус шамасында сақталады.