Украина мен АҚШ делегациялары арасындағы қақтығысты реттеу жөніндегі келіссөздер 11 наурызда Сауд Арабиясының Джидда қаласында басталған. Алғашқы этап қалай өткені жөнінде Ulysmedia.kz материалында.
КЕЛІССӨЗДЕРГЕ ҚАТЫСУШЫЛАР
Украина атынан келіссөздерге Президент кеңсесінің басшысы Андрей Ермак, Сыртқы істер министрі Андрей Сибига және Қорғаныс министрі Рүстем Умэров қатысты. АҚШ-тан Мемлекеттік хатшы Марко Рубио мен Президенттің ұлттық қауіпсіздік жөніндегі кеңесшісі Майкл Уолтц болды.
КЕЛІССӨЗДЕРДІҢ ӨТУ БАРЫСЫ
Кездесу жабық есік жағдайында өтті, сондықтан көп ақпарат жарияланған жоқ. Алайда тараптар оң көзқарастарын білдірді.
Украина Президент кеңсесінің басшысы Андрей Ермак: "АҚШ командасымен кездесу өте конструктивті басталды, және біз әділ әрі берік бейбітшілікке қол жеткізу үшін жұмыс істеп жатырмыз" деп мәлімдеді.
Келіссөздерге дейін Ермак британдық The Guardian басылымына сұхбат беріп, "украин халқы жақын арада бейбіт өмірге қайта оралады" деді. Сонымен қатар, ол қақтығысты реттеу бойынша көзқарасын айқындап: "Украинадағы атысты тоқтату тек дипломатиялық ымырамен шешілмейді. Бейбітшілік тұрақты болуы үшін алдын ала белгілі бір шарттар орындалуы тиіс. Олардың ішінде Ресейге саяси және қаржылық қысым көрсету арқылы қақтығысты қайта бастау құнын арттыру қажет" деп атап өтті.
АҚШ ДЕЛЕГАЦИЯСЫНЫҢ ҰСТАНЫМЫ
АҚШ делегациясы қысқа ғана пікір білдірді. CNN журналистері кездесудің қалай өткенін сұрағанда, ұлттық қауіпсіздік жөніндегі кеңесші Майкл Уолтц: "мақсатымызға жақындап келеміз" (getting there) деп жауап берді.