Израиль әскері Газа секторында әуе соққыларынан кейін солтүстік пен оңтүстіктің арасында буферлік аймақ құру мақсатында жердегі операция жүргізіп жатыр, деп хабарлайды Ulysmedia.kz.
ИЗРАИЛЬ ҚОРҒАНЫС ӘСКЕРІ ЖЕРДЕГІ ОПЕРАЦИЯНЫ ҚАЙТА БАСТАДЫ
Израиль Қорғаныс Әскері (ЦАХАЛ) ХАМАС террористік қозғалысы бақылауындағы Газа секторында жердегі операцияны қайта бастады. Бұл операцияның мақсаты – жағалаудағы жолақтың солтүстігі мен оңтүстігі арасында шектеулі буферлік аймақ құру, деп мәлімдеді армияның баспасөз қызметі 19 наурыз, сәрсенбі күні.
НЕЦАРИМ ДӘЛІЗІНІҢ ОРТА БӨЛІГІНЕ ДЕЙІН БАҚЫЛАУ ҚАЛПЫНА КЕЛТІРІЛДІ
"Газа секторының орталық бөлігінде және оның оңтүстігінде мақсатты жер үсті операциялары" Израильдің жағалаудағы аймаққа 18 наурыздың түнінде бастаған жаппай әуе соққыларынан кейін орын алды. Бұл қаңтардан бері қолданыста болған атысты тоқтату режимінің іс жүзінде аяқталғанын білдіреді,” деп атап өтті ЦАХАЛ.
Шабуыл аясында, басқа да әрекеттермен қатар, Газа секторының солтүстік және оңтүстік бөліктерін бөлетін "Нецарим дәлізі" деп аталатын аймақтың бір бөлігін бақылау қалпына келтірілді. Израиль әскерлері стратегиялық маңызды дәліздің орта бөлігіне дейін алға жылжыды.
БҰҒАН ДЕЙІН
Израиль 19 қаңтарда күшіне енген атысты тоқтату туралы келісімнің күшін біржақты түрде жойған еді.
BBC мәліметінше, Израиль әскері сейсенбіге қараған түні ел басшылығының бұйрығынан кейін Газа секторындағы ХАМАС нысандарына әуе соққыларын қайта бастады. Газа билігі мен жергілікті медицина қызметкерлері атқылау салдарынан ондаған адамның қаза тапқанын хабарлады.