ХАМАС кепілдегі бес тұтқынды, оның ішінде америкалық-израильдік азамат Эдан Александрды босату жөніндегі Египеттің жаңа ұсынысымен келісіп отыр. Бұл туралы CNN-ге аталған ұйымның дереккөзі ақпарат берді, деп хабарлайды Ulysmedia.kz.
ТОЛЫҒЫРАҚ
Бұған жауап ретінде ХАМАС атысты тоқтатуды және гуманитарлық көмекті қайта жандандыруды талап етпек.
Телевизия арқылы жасаған үндеуде әскери ұйым жетекшісі Халиль Аль-Хайя содырлар жасағы ұсынысты жақсы қабылдағанын атап өтті. Сондай-ақ ол ХАМАС «алғашқы бітімге келу жөніндегі келісімнің шарттарын толық сақтайды» және Израильдің «бұл ұсынысқа кедергі келтірмейтініне» үміттенеді.
Египеттің ұсынысына қатысты Израиль тарапы да жауап берді.
Премьер-министр Беньямин Нетаньяху кеше арағайындардан алған ұсынысқа сүйене отырып, бірқатар кеңес өткізді. Соңғы сағаттарда Израиль АҚШ-пен толық үйлестіру арқылы қарсы ұсынысын жеткізді, – деп мәлімдеді Израиль премьер-министрінің кеңсесі.
Осы айдың басында Израиль Газа секторына шабуылды қайта бастап, анклавқа жеткізілетін гуманитарлық көмекті толық тоқтатқан. Сондай-ақ израильдік күштер Газа секторының кейбір бөліктерінде тұрақты болатынын мәлімдеп, тірі қалған 24 тұтқын босатылғанға дейін аймақтан кетпейтінін ескертті.
Естеріңізге сала кетейік, Газа секторындағы денсаулық сақтау органдарының мәліметінше, Израильдің 2023 жылғы 7 қазанда ХАМАС жасаған лаңкестік шабуылдардан кейін бастаған әскери операциясынан кемінде 50 277 палестиндік қаза тауып, тағы 114 095 адам жараланған.