Ulysmedia.kz тілшісінің сұрақтарына жауап берген депутат Ермұрат Бапи Ресей олигархтарының Қазақстан нарығына көз салып, маңызды нысандарды сатып алуға құштарлығы жөнінде пікірін айтты. Ол Қазақстанның билігінің Ресей бизнесінің ынта-ықылас танытуын қолдамайтынын ашық жеткізді.
Ресейдің экономикалық экспансиясы жөнінде қоғамды қатты алаңдаушылық бар. Қазатомөнеркәсіп, басқа да энергетика ошақтарының акциялары немесе компаниялардың үлесі Ресейдің алып жатқаны, Ресейдің Қазақстан экономикасына тұмсығын тығып жатқаны турасында айтылады. Шынайы тұрғыда қарағанда Ресейдің басқа баратын жері жоқ. Қазақстанға ықыласы содан ауып жатыр деп ойлаймын. Ал Қазақстанның бұған ынта-ыждахатымен кірісіп жатқанын немесе жатпағаны жөнінде баға бере алмаймын, – деді Ермұрат Бапи.
Депутаттың айтуынша, кейінгі деректер бойынша Ресейдің миллиардарлері 149 адамға өскен. Бапи мұның өзі соғыстың өзі Ресей бизнесін байытып жатқанын көрсететінін айтады.
Бұл – байып жатқан бизнесмендерінің қаражатының бір бөлігін біз жаққа салуының амалдары болуы мүмкін. Бірақ мен өзім мемлекет тарапынан Ресейдің Қазақстан экономикасына ынта-ықыласына қолдау көрсетуімен келіспеймін. Себебі Ресей қазір бүкіл әлемде оқшауланған ел. Онымен ауыз жаласу бір жағынан халықаралық деңгейде, әлемдік деңгейде Қазақстанның, президенттің имиджіне жақсы әсер қалдырмайды деп ойлаймын, – деді Ермұрат Бапи.
Атырау мұнай өңдеу зауытының сатылатыны туралы алғаш рет Ulysmedia.kz өз дереккөздеріне сілтеме жасап хабарлаған еді. Жарияланым алдында біз ҚазМұнайГазға сауал жолдап, инсайдерлік ақпаратты растауды немесе жоққа шығаруды сұрадық. Сондай-ақ, ұлттық компанияның мұнай-химия саласын өз күшімен дамыта алмау себебін түсіндіруін өтіндік. Алайда компания баспасөз қызметі бұл сұрақтарға жауап берген жоқ.
Сонымен қатар, негізгі сұрақтарға – елдің стратегиялық саласы қай бағытта дамып жатқаны, барлық шешімдер неге жабық жағдайда қабылданатыны, ал жаңа энергетика министрі АМӨЗ келісімі жайында хабардар ма – бұл сұрақтарға жауап ала алмадық.
Белгілісі – ресейлік «Татнефть» Қазақстандағы «Бутадиен» жобасындағы 100% үлесті иеленген. Бұл стратегиялық ресурс екі кезеңде берілді: алдымен ҚМГ-ның 25% үлесі «Самұрық-Қазына» қорының еншілес компаниясы «Самұрық Өңдеуге» өткізілді. Кейіннен қалған 25% үлес те «Татнефтьке» беріліп, олар бұл жобаның толыққанды монополисіне айналған.