Азаматтық авиация комитетінің төрайымы Салтанат Томпиева депутаттардың қайтарымсыз билеттерге қатысты сынына жауап берді, деп хабарлайды Ulysmedia.kz.
НЕ ҮШІН ҚАЙТАРЫЛМАЙДЫ?
Ол қайтарымсыз билеттердің ең төмен тарифті қамтамасыз ету үшін жасалғанын түсіндірді.
"Бүгінде әуе компаниялары атап өткендей, мысалы, 2024 жылы сатылған билеттердің 70%-дан астамы қайтарымсыз болып табылады. Алайда солардың тек 2%-ын ғана жолаушылар қайтарғысы келген. Сондықтан қайтарымсыз билеттерге үлкен сұраныс бар деп қорытындылауға болады", – деді Томпиева.
Оның айтуынша, бұл опция уақытын алдын ала жоспарлайтын жолаушыларға тиімді. Компаниялар олар үшін ең төмен тариф ұсынады.
“Егер қайтарымсыз билеттерді алып тастасақ, компаниялар билеттің құны 100% қайтарылатынын ескере отырып, орташа немесе одан жоғары тариф белгілейді. Яғни қазіргі уақытта ең төмен тариф бойынша қайтарымсыз билет сатып алып жүрген 70% жолаушылар осы мүмкіндіктен айырылады.Сонымен қатар, бұл жағдайда отандық авиакомпаниялар шетелдік тасымалдаушылармен тең емес жағдайға тап болады. Себебі біз шетелдік компаниялардың тарифтерін реттеу құқығына ие емеспіз. Демек, олар қайтарымсыз билеттерді төмен тарифпен сата алады, ал біздің әуе компаниялар орташа немесе одан жоғары тариф белгілеуге мәжбүр болады", – деп қорытындылады авиация комитетінің төрайымы.
2025 жылдың 2 сәуірінде депутат Бауыржан Қаниев Көлік министрлігіне ұшақ билеттерінің қайтарымдылығына қатысты авиакомпаниялар саясатын реттейтін ережелер әзірлеуді ұсынды.